22 წლის ირუ ხეჩანოვი საზოგადოებამ რამდენიმე თვის წინ გაიცნო, როდესაც საზოგადოებრივი მაუწყებლის პროექტ „ვოისში“ გაიმარჯვა და „ევროვიზიაზე“ გასვლის საგზური მოიპოვა. წარუმატებლობის შემდეგ ირუს ვრცელი ინტერვიუ მედიაში აღარ გავრცელებულა. ახლახან მომღერალი გადაცემა, „სიცრუის დეტექტორს“ ესტუმრა, სადაც ცხოვრებისეულ მარცხებზე ღიად ისაუბრა:
– საკმაოდ დიდი ნეგატივი მოჰყვა ჩემ ინტერვიუს, როდესაც მკითხეს, რომ “ევროვიზიაზე” წასვლას ვიმსახურებდი თუ არა. მეც გულწრფელად ვუპასუხე, რომ მხოლოდ გამარჯვებაზე ვარ ფოკუსირებული. ეს ინტერვიუ რომ გამოვიდა, ამას მოჰყვა ძალიან დიდი ნეგატივი. ცუდ მესიჯებს ვიღებდი მოკლე ტექსტურ შეტყობინებებში.
“ვოისის“ მოგებაში დარწმუნებული არ ვყოფილვარ, მაგრამ კოსმოსში ყოველთვის ვუშვებდი გამარჯვების მესიჯებს და იმედი მქონდა, უკან დამიბრუნდებოდა. ჩემი ნათქვამი, რომ მე ვფიქრობ, რომ მე უნდა წარვადგინო ევროვიზიაზე, სხვა მონაწილეების გულშემატკივრებს არ ესიამოვნათ. ეს ყველაფერი ძალიან ცუდად მიიღო საზოგადოებამ, მაგრამ ჩემი აზრით, ასეთ ნეგატივსა და აგრესიას არავინ არ იმსახურებს. გამარჯვების მერე მწერდნენ, რომ არაფრის ღირსი არ ვიყავი და ნახევარ ფინალშიც არ გამიშვებდნენ და ამას არც მე და არც ჩემი ოჯახი არ იმსახურებდა.
ვცდილობ, მშობლებს არ გავუცრუო იმედები და ამიტომ საკუთარ თავს ბევრს ვთხოვ ხოლმე. დამემართა პანიკური შეტევები, სუნთქვის უკმარისობა, უფუნქციო ვიყავი, კიბეზე ასვლის დროსაც იმდენად ცუდად ვგრძნობდი თავს, რომ ვერ ვსუნთქავდი. შფოთვითი აშლილობა დამემართა. ეს არავის ბრალი არ არის, ჩემს ხასიათშია. დედა ყოველთვის მეუბნებოდა, რომ ცხოვრებაში რისი შესაძლებლობაც გაქვს, ბოლომდე უნდა გამოიყენო, ამას ჩემი ხასიათიც დაემატა. დამჭირდა ფსიქიატრის ჩარევა, მედიკამენტოზური მკურნალობა, ცოტა ხანია, რაც წამლებს თავი დავანებე.
დედამ და მამამ ადრეულ ასაკში შექმნეს ოჯახი. ჩემზე უფროსი და მყავს და დედა ჩვენზე იყო გადმორთული და საკუთარი კარიერის მიტოვება მოუწია. და-ძმებში ყველაზე დამყოლი მე ვიყავი და დედას უნდოდა, რაც თვითონ დააკლდა და ვერ გააკეთა, ჩემზე გადმორთულიყო. სულ მანქანაში ვცხოვრობდი, უამრავ წრეზე დავყავდი, ერთი პერიოდი გადავიწვი კიდეც. მაგრამ მაინც მადლობელი ვარ, დისციპლინას მივეჩვიე.
კითხვაზე, “აღმოგიჩენიათ, რომ დაბადების დღეზე დასაპატიჟებელი მეგობრები აღარ შემოგრჩათ?”- მომღერალმა დადებითად უპასუხა.
“ისე მოხდა ჩემს ცხოვრებაში, რომ არ მყავს ძალიან ბევრი მეგობარი. არ გამიმართლა… ისე მოხდა, რომ ბევრი მეგობარი არ შემომრჩა… ძალიან გადაყოლა ვიცი ადამიანებზე, ხშირად მქონდა ის მომენტი, რომ მათგანაც ველოდებოდი მსგავს მიდგომებს“, – ამბობს ირუ ხეჩანოვი.
წყარო: ambebi.ge