კანადაში მასშტაბური ტყის ხანძრების გამო ნიუ-იორკში ჰაერის ხარისხმა საშიშ დონეს მიაღწია.
ამერიკული მედია აღნიშნავს, რომ ნიუ-იორკი ხანძრების გამონაბოლქვა უფრო მეტად დააზარალა, ვიდრე რომელიმე სხვა ქალაქი ან შტატი.
ოფიციალური პირები ხალხს მოუწოდებენ შეზღუდონ გარე საქმიანობა.
საქალაქო საგანგებო სიტუაციების კომისარმა განაცხადა, რომ სმოგი ნიუ-იორკში სავარაუდოდ შენარჩუნდება მომდევნო რამდენიმე დღის განმავლობაში. მან ჰაერის ამჟამინდელ ხარისხს უწოდა ყველაზე ცუდი, რაც კი ოდესმე დაფიქსირებულა და დასძინა, რომ ნიუ-იორკი გახდა მეორე ქალაქი ინდოეთის დელის შემდეგ ჰაერის დაბინძურების თვალსაზრისით.
შეგახსენებთ, კანადაში ტყეების მასშტაბური ხანძარია. ცეცხლმა 4 მილიონამდე ჰექტარი დაწვა.
კვამლის დიდი ნაწილი კვებეკიდან მოდის, სადაც ხანძრის 150 კერაა. პროვინციაში 12 000-დე მოქალაქის ევაკუაცია უკვე განხორციელდა და კიდევ 4 000 ადამიანის ევაკუაციაა მოსალოდნელი.
კანადაში გაჩენილი მასშტაბური ხანძრის გამო, კვამლშია გახვეული ამერიკის ნაწილიც.