რამდენიმე დღის წინ, პირველი საუნივერსიტეტო კლინიკის დირექტორმა ლევან რატიანმა განმარტა თუ რა განსხვავებაა კორონავირუსით ინფიცირებასა და კორონავირუსით დაავადებას შორის. აღნიშნულის შესახებ რატიანმა “ტვ პირველის” ეთერში ისაუბრა.
“კორონავირუსით ინფიცირება და PCR ტესტით მისი ცხვირ-ხახით, თუ პირ -ხახით იდენტიფიცირების შემთხვევა არ ნიშნავს იმას, რომ ადამიანი არის დაავადებული Covid-19-.ით. ანუ თუ ადამიანს აქვს მცირე სიმპტომი და PCR ტესტმა აჩვენა, რომ ის არის დადებითი, მაგრამ არ აქვს გამოვლენილი სიმპტომატიკა, ეს არ ნიშნავს, რომ ადამიანი არის Covid-19-ით დაავადებული.
Covid-19-ით დაავადება ნიშნავს – ინფექციას პლუს კლინიკური გამოვლინება. ეს განსხვავება, სამწუხაროდ, ჩვენი მოსახლეობისთვის არ იყო მკაფიოდ მიწოდებული. ანუ ინფიცირება არ ნიშნავს დაავადებას”, – განაცხადა ლევან რატიანმა. ამ თემამ ჩვენში დიდი პოლემიკა გამოიწვია. ამ თემაზე “ფეისბუქის” პირად გვერდზე წერს ინფექციონისტი მაია ბუწაშვილი:
“ძალიან ბევრი მითქმა-მოთქმა და შეკითხვებია ტელევიზიით გაკეთებულ იმ განცხადებასთან დაკავშირებით, რომ “კორონავირუსით ინფიცირება არ ნიშნავს დაავადებას” და რომ თუ ადამიანს სიმპტომები არა აქვს და PCR ტესტით დადებითია, ის არის უბრალოდ ინფიცირებული და მას არა აქვს დაავადება კოვიდი.
სინამდვილეში ასეთი განსაზღვრება არ არსებობს. ყველა ადამიანი, ვისაც ლაბორატორიულად დაუდასტურდება კორონავირუსით ინფექცია, მიუხედავად იმისა, აქვს თუ არა გამოხატული სიმპტომები, კვალიფიცირდება, როგორც კოვიდის დიაგნოზის მქონე. ანუ ასეთი გარჩევა, რომ უსიმპტომო არის მხოლოდ ინფიცირებული და სიმპტომიანს აქვს დაავადება კოვიდი, არ არსებობს. მეტიც, შეიძლება კლინიკურად პაციენტი უსიმპტომო იყოს და თუ რადიოლოგიურად აღინიშნებოდეს კოვიდისთვის დამახასიათებელი პნევმონიის სურათი. უსიმპტომო მიმდინარეობა არის სწორედ რომ კოვიდის ერთ-ერთი ფორმა. შეგახსენებთ, რომ კოვიდის მიმდინარეობა შეიძლება იყოს უსიმპტომო, მსუბუქი, საშუალო სიმძიმის, მძიმე და კრიტიკული, აქ ჩვენ არ ვლაპარაკობთ იმ ადამიანებზე, რომლებიც გადაიტანენ კოვიდს და შემდეგ დიდხანს PCR ტესტი რჩებათ დადებითი. ასეთ დროს, როგორც ვიცით, ტესტი უბრალოდ იჭერს ვირუსის ფრაგმენტებს და ასეთი ადამიანი აღარ არის დაავადებული და არც გადამდები. თითქოს ამ განმარტებებს დიდი მნიშვნელობა ადამიანებისთვის არ უნდა ქონდეს, მაგრამ ზემოხსენებულმა განცხადებამ რატომღაც ძალიან ბევრი კითხვები და პოლემიკა გამოიწვია. ამიტომ გამოვეხმაურე”.