სახეზე გამონაყრის და პრობლემური კანის მკურნალობა ორთქლის აბაზანებითა და შინაური რეცეპტით მომზადებული სპეციალური ნიღბებით უსაფრთხო და მარტივია. თუ აკნეს უჩივით, გამონაყარი დისკომფორტს გიქმნით, სცადეთ ეს გამოცდილი მეთოდები სახლის პირობებში და პრობლემასაც დაივიწყებთ.
ორთქლი ხსნის ფორებს, არბილებს და წმენდს კანს. რეკომენდებულია ყველა ტიპის კანისთვის. აადუღეთ 2 ლიტრი წყალი. მაქსიმალური ეფექტისთვის შეგიძლიათ სამკურნალო მცენარეები ან მცენარეული ზეთები გამოიყენოთ. ცხიმიანი კანისთვის კარგია ლავანდა, მწვანე ჩაი, ევკალიპტის ზეთი, ლიმონის თხელი ნაჭერი, გვირილა და პიტნა. მშრალი კანისთვის კი – ლავანდა, გვირილა, ვარდის ზეთი და მწვანე ჩაი. მგრძნობიარე კანისთვის გამოიყენეთ გვირილა და ლავანდა. კომბინირებული და ნორმალური კანისთვის – ლავანდა, მწვანე ჩაი და ჩაის ხის ზეთი. როდესაც თქვენი კანის ტიპისთვის მცენარეებს შეარჩევთ, ჩაყარეთ ისინი ცხელ წყალში და 2 წუთით გააჩერეთ. გადაიტანეთ თასში და დაელოდეთ, რომ წყალი ცოტა გაგრილდეს – ორთქლი ძალიან ცხელი არ უნდა იყოს. გადაიფარეთ თავზე პირსახოცი, ისე, რომ ორთქლი პირდაპირ სახეს მოხვდეს. ასე დაიორთქლეთ სახე 10 წუთის განმავლობაში და პირსახოცით ნაზად შეიმშრალეთ. ორთქლით გაწმენდილ სახეზე, წაისვით ნიღაბი, რომელსაც სახლში მარტივად დაამზადებთ. გაითვალისწინეთ, ორთქლი ფორებს ხსნის და საჭიროა, ისინი დაიხუროს. ამისთვის, სახე ჯერ ნელ-თბილი ან ცივი წყლით დაიბანეთ და შემდეგ, ნიღაბი დაიდეთ. პროცედურა ჩაიტარეთ კვირაში ერთხელ.
👉ლიმონის, კვერცხისა და თაფლის ნიღაბი: 1 კვერცხს დაამატეთ 1 ჩაის კოვზი თაფლი და 3-4 წვეთი ლიმონის წვენი. კარგად ათქვიფეთ. დაიდეთ სახეზე და 10 წუთით გაიჩერეთ;
👉ვაშლისა და ხაჭოს ნიღაბი მშრალი კანისთვის: 2 ჩაის კოვზი ხაჭო და 1 ცალი გახეხილი ვაშლი კარგად აურიეთ, შეიზილეთ სახეზე და 20 წუთით გაიჩერეთ;
👉იოგურტის ნიღაბი: სახეზე შეიზილეთ იოგურტის სქელი ფენა და დაიტოვეთ 20 წუთის განმავლობაში;
👉თაფლისა და ლიმონის ნიღაბი ცხიმიანი კანისთვის: 1 ჩაის კოვზი თაფლი და 1 ჩაის კოვზი ლიმონის წვენი ერთმანეთში შეურიეთ, წაისვით სახეზე და 15 წუთით გაიჩერეთ;
👉კვერცხის გულის ნიღაბი: 1 კვერცხის გული 1 ჩაის კოვზ ცივ რძეში შეურიეთ და სახეზე შეიზილეთ. სანამ მასა სახეზე კარგად არ შეგახმებათ, არ ჩამოიბანოთ.
👉თაფლისა და დარიჩინის ნიღაბი: 2 ჩაის კოვზი თაფლი და 1 ჩაის კოვზი დარიჩინი აურიეთ ერთმანეთში და წაისვით სახეზე. 10-15 წუთის მერე კი თბილი წყლით ჩამოიბანეთ.
პროცედურის ჩატარების შემდეგ საჭიროა კანის დატენიანება. ამიტომ, აუცილებლად გადაისვით სახის კანზე ის მკვებავი საცხი, რომელიც თქვენი ტიპის კანისთვისაა განკუთვნილი.
წყარო:თბილისელები