ცოტა ხნის წინ გორში 4 წლის თომა წიქარიძე სავარაუდოდ, ჩუტყვავილას ვირუსის გართულებებით დაიღუპა.
ბავშვს ჩუტყვავილას სიმპტომები დაახლოებით 1 კვირის წინ განუვითარდა. მას მშობლები სახლის პირობებში, ოჯახის ექიმის რეკომენდაციების საფუძველზე მკურნალობდნენ. მცირეწლოვანის ჯანმრთელობის მდგომარეობის გაუარესების შემდეგ ბავშვი კლინიკა “გორმედში” გადაიყვანეს.
ციციშვილის სახელობის კლინიკაში ამბობენ, რომ ბავშვი მათთან პრაქტიკულად გარდაცვლილი მიიყვანეს.
“გამონაყარი იყო ჩუტყვავილასი, ანამნეზით ვიცით, რომ იყო ჩუტყვავილა, მე-7 დღე იყო ავადობის, ჩვენთან შემოვიდა გულის გაჩერებით, გაფართოებული გუგებით და სუნთქვის გაჩენებით, ამას ჰქვია უკვე კლინიკური სიკვდილი. გზაში, ტრანსპორტირებისას ცუდად იყო, მშობელს მოჰყავდა თვითდინებით. ჩაუტარდა რეანიმაციული ღონისძიებები, მაგრამ უშედეგოდ. დღეს დილას გარდაიცვალა, დაახლოებით ერთი საათიც არ ყოფილა ჩვენთან, პრაქტიკულად გარდაცვლილი იყო”, – ამბობს კლინიკის დირექტორი, მაია ჩხაიძე.