აქტივისტი დომენიკ მანგო სოციალური ქსელით „ქართული ოცნების“ მიერ ფილოლოგ ლევან ბერძენიშვილისადმი აგორებულ კამპანიას გამოეხმაურა.
„გადაივლის არჩევნები და დაანებებენ ბერძენიშვილს თავს. ვიღაცის გაშავება სჭირდებათ, რომ ქულები თვითონ დაიწერონ არჩევნებში, სხვისი “მტრად” ქცევით. როგორც წინასაარჩევნოდ იყო დავით გარეჯის თემა წამოწეული, შემდეგ კი ისე მიაგდეს, რომ ჩამონგრევის პირასაა დღეს. მაშინაც გააშავეს კარტოგრაფები, “აი ისინი ქვეყნის მტრები, ჩვენ კი მოკეთეები ვართ” ესაა მათი წინასაარჩევნო პროპაგანდა. ვიღაცის ფონზე უკეთესად უნდა წარმოიჩინონ თავი და რაც მთავარია, სხვის გაშავებაში მილიონები უნდა ხარჯონ. რაც ყველაზე სამწუხაროა, ეს ხალხიც დაუსრულებელ წრეზე უწერს ქულებს ამ დაბალი დონის ორღობეს“ , – წერს ის.
შეგახსენებთ, „ქართული ოცნების“ თავმჯდომარემ, ირაკლი კობახიძემ თქვა, რომ ბერძენიშვილი დავალებებს ასრულებს და ქართველ საზოგადო მოღვაწეებს ლანძღავს.
გუშინ ლევან ბერძენიშვილის სახლთან 20-მდე ნიღბიანი ადამიანი იმყოფებოდა.