ნაქალაქევში 28 წლის მამაკაცს მეხუთე დღეა უშედეგოდ ეძებენ და სამძებრო–სამაშველო ღონისძიებები გრძელდება, თუმცა დაკარგულის კვალი ამ დრომდე არ ჩანს.
ასპინძის მუნიციპალიტეტის საკრებულოში, სოფელ ნაქალაქევის დეპუტატის, პავლე ბერიძის თქმით, 28 წლის ახალგაზრდის დაკარგვის ზუსტი მიზეზები უცნობია. ძებნა გრძელდება: „ჯერ–ჯერობით არაფერი ჩანს. ვეძებთ, თითქმის 24–საათიან რეჟიმში მიმდინარეობს სამძებრო სამუშაოები“.
შინაგან საქმეთა სამინისტრომ გამოძიება სსკ–ის 115–ე მუხლით დაიწყო, თვითმკვლელობამდე მიყვანას გულისხმობს.
ცნობისთვის, 28 წლის კაცი სახლიდან 5 მაისის დილით გავიდა. იგი სოფელ თმოგვიდან რამდენიმე კილომეტრში მდებარე ფერმაში უნდა მისულიყო. ფერმამდე მისასვლელად კაცი მტკვარზე უნდა გადასულიყო. არსებობს ვარაუდი, რომ ის წყალში ჩავარდა. ადგილობრივების თქმით, ამ ადგილზე ხიდი არ არის, მოსახლეობა წყალზე გაჭიმული ბაგირით სარგებლობდა, რომელზეც კალათა იყო ჩამოკიდებული.
ახალგაზრდის დაკარგვის შემდეგ, ერთ–ერთ მოქალაქე “სამხრეთის კარიბჭესთან” აცხადებდა, რომ 28 წლის კაცმა წყალზე გადასვლელად კალათა არ გამოიყენა და ბაგირზე ჩამოკიდებულმა სცადა მეორე მხარეს გადასვლა.
სამძებრო ღონისძიებების დაწყების შემდეგ, მოსახლეობამ შემთხვევის ადგილიდან რამდენიმე კილომეტრში, მტკვარში დაკარგული კაცის ზურგჩანთა იპოვეს.