ნიგერიის პრეზიდენტი, ბოლა აჰმედ ტინაბუ „ნაპოლის“ მიერ იტალიის ჩემპიონობას „ტვიტერით“ გამოეხმაურა.
ცხადია, მან მთავარი აქცენტი თავის თანამემამულეზე, ნეაპოლური კლუბის ლიდერზე, ვიქტორ ოსიმენზე გააკეთა.
„ვფიქრობ, ყველა ვთანხმდებით, რომ იტალიაში კიდევ ერთი კორონაცია იყო, სადაც ჩვენმა ბიჭმა, ვიქტორ ოსიმენმა მოიპოვა გვირგვინი, როგორც სერია ა-ს ახალმა მეფემ. ვიქტორმა გააგრძელა ნიგერიის საფეხბურთო ბრწყინვალების ტრადიცია ფეხბურთის გლობალურ არენაზე. ჩვენ ყველანი მისით ვამაყობთ და წარმატებებს ვუსურვებთ კარიერაში, რომელიც უკვე შესანიშნავია”, – წერს ტინაბუ.
Lega Serie A-მ გამოაქვეყნა კვარაცხელიას ერთგვარი კორონაციის სურათი, სადაც მარადონა ხვიჩას თავზე გვირგვინს ადგამს. სოციალურ ქსელში ამან ნიგერიელთა გაღიზიანება გამოიწვია. ისინი კომენტარებში აღნიშნავდნენ, რომ ეს რასისტულია, რადგან გვირგვინი ოსიმენსაც ეკუთვნოდა. ნიგერიის პრეზიდენტმა ზემოაღნიშნული პოსტი სწორედ ამის შემდეგ დაწერა.
ნეაპოლის ქუჩებში ასევე გაჩნდა კვარასა და მარადონას „დამაკავშირებელი“ გამოსახულებები.
შეგახსენეთ, ამ სეზონში ოსიმენისა და ქართველი შემტევის, ხვიჩა კვარაცხელიას დუეტი ფანტასტიკურად გამოიყურებოდა. ნოგერიელი ცენტრფორვარდის ანგარიშზე 23 გოლია, ხოლო ქართველმა ვინგერმა მეტოქის კარი 12-ჯერ აიღო.