თბილისში, ვარკეთილში წარსულში ნასამართლევმა მამაკაცმა ნათესავი ქალბატონი მოკლა.
გამოძიების ინფორმაციით, დაკავებულმა ნათესავ ქალს ხელკეტისა და ელექტროშოკის გამოყენებით სხეულზე სხვადასხვა სახის დაზიანებები ხელკეტისა და ელექტროშოკის გამოყენებით მიაყენა, რის გამოც ის ადგილზე გარდაიცვალა.
გარდაცვლილი 36 წლის ქალია, სავარაუდო ეჭვმიტანილი, ქალის ნათესავი 41 წლის კაცია, რომელიც პოლიციამ უკვე დააკავა.
დაკავებული დანაშაულს აღიარებს. მკვლელობის სავარაუდო მიზეზად ეჭვიანობა სახელდება.
მეზობლები ამბობენ, რომ 36 წლის ქალი ქმარს იყო გაშორებული და სახლში ბავშვთან ერთად ცხოვრობდა. ადგილობრივების თქმით, ქალთან ხშირად მოდიოდნენ ნათესავები და სულ ჩხუბის და ყვირილის ხმა ისმოდა.
„რომ ამოვიარე შემოღობილი იყო უკვე, ბევრი პოლიციელი იყო და რაღაცას ეძებდნენ. დღემდე არ ვიცი, რა მოხდა. მეუღლე არ ყავდა, შვილი დარჩა”. – ამბობს მეზობელი.
41 წლის კაცი წინასწარ პატიმრობაში იმყოფება და ბრალის დამტკიცების შემთხვევაში 15 წლამდე პატიმრობა ემუქრება.
შემთხვევა ვაზისუბანში, ჰუალინგის დასახლებაში რამდენიმე დღის წინ მოხდა. ამ დრომდე ფემიციდის ეს შემთხვევა გაუხმაურებელი იყო. შსს-მ მომხდარზე განცხადება მხოლოდ რამდენიმე წუთის წინ გაავრცელა.