ქართველმა მძიმეწონოსანმა, ლაშა ტალახაძემ ერევანში გამართულ ევროპის ჩემპიონატზე კონტინენტის ჩემპიონობა მეშვიდედ მოიპოვა.
მან ატაცში 210, 217 და 222 კგ დაძლია, რამაც ლაშა ტალახაძეს ოქროს მედალი მოაპოვებინა. საქართველოს ნაკრების ერთ-ერთმა წევრმა, ბაქარ თურმანიძემ 170 და 176 კგ დააფიქსირა.
აკვარაში ლაშა ტალახაძემ თავდაპირველად 246, შემდგომ კი 252 კგ დააფიქსირა, რის შედეგადაც იგი ოქროს მედლის მფლობელი გახდა, ხოლო აკვარაში თურმანიძემ მეხუთე ადგილი დაიკავა, რადგან მისი შედეგი 210 და 216 კგ იყო.
ლაშა ტალახაძემ ევროპის ჩემპიონატზე პირველი გამარჯვება 2016 წელს მოიპოვა. იგი მსოფლიოს ექვსგზისა და ოლიმპიური თამაშების ორგზის ჩემპიონია.
ერევანში, ევროპის ჩემპიონატის გახსნის საზეიმო ცერემონიაზე ლაშა ტალახაძემ 2022 წლის საუკეთესო ძალოსნის ტიტული გადაეცა. ეს იყო პირველი შემთხვევა, როდესაც საერთაშორისო სპორტულმა ჟურნალისტებმა ქართველი “გოლიათი” საუკეთესოდ აღიარეს.
საქართველოს ნაკრების წევრებმა ერევანში 17 სხვადასხვა სინჯის მედალი მიიღეს, მათგან შვიდი ოქროსია.
ძალოსნობაში მსოფლიოს 2023 წლის ჩემპიონატი 2-დან 17 სექტემბრის ჩათვლით საუდის არაბეთში გაიმართება.