„ნაპოლის“ მთავარმა მწვრთნელმა, ლუჩანო სპალეტიმ გუშინ „მილანთან“ ჩემპიონთა ლიგის განმეორებითი 1/4-ფინალური თამაშის შემდგომ ასეთი კომენტარი გააკეთა:
„პირველ ყოვლისა, მილანს გამარჯვება მინდა მივულოცო. ორივე შეხვედრაში, მათ მაქსიმუმი გააკეთეს, რაც გუნდის მოწიფულობაზე მეტყველებს. ფეხბურთელებმა იცოდნენ შეტევაში როდის გადასულიყვნენ და თავი როდის დაეცვათ. ჩემს ბიჭებზეც მინდა ვთქვა: ჩემპიონთა ლიგაში უმაღლეს დონეზე ვითამაშეთ, ვცდილობდით რაღაცები გამოგვეგონებინა, ცოტა გამოცდილებაც დაგვაკლდა, სანაკრებო მატჩების შემდეგ კი ზოგიერთს სუნთქვა უჭირდა.
მილანს პირველ შეხვედრაშიც კარგად ვეთამაშეთ და ახლაც. მათი გოლი უნდა აგვერიდებინა, რადგან ბურთი ჩვენი იყო. მეტოქის საჯარიმოში კარგები არ ვიყავით. სანაკრებო პაუზამდე, ჩვენ მშვენიერ მენტალურ და ფიზიკურ კონდიციებში ვიყავით, შემდეგ რაღაც დაგვაკლდა, რაღაც დეფექტები შემოგვემატა.
მსაჯის გადაწყვეტილებები ჩემთვის როგორ გამოიყურებოდა? კოვაჩს არ გავიხსენებ, რაც მოხდა იქ, მილანის გულშემატკივრების გარდა, ყველა ვთანხმდებით.. დღეს ლოსანოზე პენალტი არ მოგვცეს, კონტაქტი კი არა, ლეაუმ ფეხში ჩაარტყა. არ შეიძლება ასეთი ეპიზოდი არ ნახო“ , – თქვა სპალეტიმ.
შეგახსენებთ, გუშინდელი შეხვედრა ნეაპოლში ფრედ, 1:1 დასრულდა და „ნაპოლი“ ლიგას გამოეთიშა, რადგან პირველი შეხვედრა 0:1 ჰქონდა წაგებული.
კვარაცხელიამ 81-ე წუთზე თერთმეტმეტრიანი ვერ გამოიყენა.