“ხალხი არ გადააგდოთ, არ გეპატიებათ, იცოდეთ” – გაერთიანებული ოპოზიციის მისამართით წერს მერაბ სეფაშვილი სოციალურ ქსელში.
მომღერალმა 29 ოქტომბერს ნაციონალური მოძრაობის შემაჯამებელ და მხარდამჭერ აქციაზე, თავისუფლების მოედანზე, სხვა კოლეგებთან ერთად რამდენიმე სიმღერა შეასრულა. ამით, ბუნებრივია, ღიად დააფიქსირა თავისი მხარდაჭერა ამ ძალის მიმართ. დღეს კი სეფაშვილი იმედგაცრუებული ჩანს.
– ხალხი არ გადააგდოთო, წერთ. რას გულისხმობთ, მერაბ?
– შევდივართ, არ შევდივართო, რომ დაიწყეს, ეს არ მომწონს. ასე მიიყვანო ხალხი, გაწუწო-გამოწუწო, მერე წახვიდე და წამოწვე, ეგრე მე არ მომწონს.
ეს ხალხის პროტესტია და აბსოლუტურად ნორმალურია. პოლიტიკური ლიდერები ხალხის ნებას უნდა დაემორჩილონ. ხალხი აპროტესტებს იმას, რომ ხმები გაუყალბეს. ამაზე რომ პარტიებმა ხელი მოაწერეს, შევალთ პარლამენტში-არ შევალთო და თუ აღმოჩნება, რომ ეს თავისი კეთილდღეობისთვის გამოიყენეს, ვინც არ უნდა იყოს, ეს ჩემთვის აბსოლუტურად მიუღებელია.
– თქვენ ღიად დაუჭირეთ მხარი “ნაციონალურ მოძრაობას”, იმღერეთ აქციაზე. ახლა კი უკმაყოფილებას გამჩენვთ.
– მე რეალობას ვუყურებ. რაც არის იმას, ვამბობ. თუ არ მოიქცევიან კარგად, შევაგინებ! უკაცრავად…
– იმ მხარდასაჭერი აქციის შემდეგ საპროტესტო აქციაზე არ ყოფილხართ?
– ვეღარ მივედი, თვითიზოლაციაში ვარ. ჩემს მეგობარს აღმოაჩნდა კორონავირუსი და მეც გადავედი თვითიზოლაციაში. მადლობა, ღმერთს, ჯერჯერობით არაფერი სიმპტომი არ მაქვს.