ვიცე-პრემიერის მაია ცქიტიშვილის განცხადებით, 12 ნოემბერს საქართველო-ჩრდ.მაკედონიის მატჩი გულშემატკივრების გარეშე ჩატარდება. მისი თქმით, ეს აკრძალვა ქვეყანაში არსებული ეპიდემიოლოგიური ვითარებიდან გამომდინარეობს.
„ჩვენ არ შეგვიძლია პოლიტიკური პროცესის შეზღუდვა და აკრძალვა. მაგრამ, როდესაც საუბარია სპორტულ და კულტურულ ღონისძიებაზე, ამის შეზღუდვა შესაძლებელია ქვეყანაში არსებული მძიმე ეპიდემიოლოგიური ფონის გამო.
როდესაც ვსაუბრობთ უეფას მიერ დაწესებულ ლიმიტზე, რომლის თანახმადაც, შესაძლოა, მოხდეს გულშემატკივრების 30%-იანი დასწრება, მათივე რეკომენდაციაში აღნიშნულია, რომ ეს უნდა განისაზღვროს კონკრეტული ქვეყნის ეპიდემიოლოგიური ვითარებიდან გამომდინარე.
სამწუხაროდ, დღეის მდგომარეობით, მატჩის ჩატარება გულშემატკივრების გარეშე მოგვიწევს. ყველამ ერთად, დიდი პასუხისმგებლობა უნდა გამოვიჩინოთ და ჩვენს ფეხბურთელებს ვუგულშემატკივროთ სახლებიდან, ამით დარწმუნებული ვარ, ისინი უარესად არ ითამაშებენ“,- აღნიშნა მაია ცქიტიშვილმა.
ინფორმაციისთვის, ევროპის ჩემპიონატის საკვალიფიკაციო ეტაპის პლეი-ოფის ფინალი საქართველოსა და ჩრდილოეთ მაკედონიას შორის 12 ნოემბერს შედგება.
ამ მატჩში გამარჯვების შემთხვევაში საქართველოს ნაკრები ევროპის ჩემპიონატზე ითამაშებს.