დღეისთვის, ოზურგეთში, ბევრგან შეხვდებით სოფლიდან ჩამოტანილ, ყუთებით დადგმულ კვერცხს, რომელსაც დიდი ასოებით აწერია: „ფასი 50 თეთრი“.
_დღეისთვის კი ვაფასებთ 50 თეთრს, თუმცა აღდგომამდე ორ კვირაზე მეტი დროა. ვფიქრობთ, გაძვირდება. შეიძლება, ფასი გაორმაგდეს კიდეც. შარშან , მაგალითად, ასე მოხდა. ამიტომ უმჯობესია მსურველმა, მომხმარებელმა ახლა იყიდოს და შეინახოს.
_შეინახეთ მაცივარში, რა აქვს „ზორი“? სააღდგომოდ გაძვირდება, აბა, რას იზამს?- ღიმილით გვეუბნება გულიკო მოდებაძე, რომელიც , მისივე თქმით, სოფლიდან ჩამოტანილ კვერცხს იბარებს, მერე კი ყიდის და ასე მიაქვს შინ „პურის ფული“ თუ კონკრეტულად პური.
იაფი არაა, თუმცა დაიკლო რძემ და რძის ნაწარმის ფასმა. ერთი ლიტრი რძე ორი ლარი ღირს. ერთი თვის წინ 2,50 -3 ლარი ღირდა. ასევე შესაძლებელია ერთი კილოგრამი ყველის 11 ლარად ყიდვა. ცოტა ხნის წინ კი, ნაახალწლევს, ერთი კილოგრამი ყველი 14-15 ლარი ღირდა.
ერთი კილოგრამი ხორცი (საქონლის) 20 ლარი ღირს. გოჭი, ცოცხალი წონით 14-15 ლარი ღირს, ერთი კილოგრამი. სავარაუდოდ, როგორც აქ ამბობენ, სააღდგომოდ გაძვირდება ან პირიქით, შესაძლებელია მოხდეს ისე, რომ გაიაფდეს.
_ახლა გაზაფხულის პირია. ყველი, კვერცხი, რძე, ამ დროს, ყოველთვის იკლებს ფასს, რადგან მატულობს მეწველი პირუტყვის რაოდენობა. ქათამიც უფრო აქტიურად დებს კვერცხს. ეს ბუნებრვი მდგომარეობაა ამ დროისთვის. გოჭის ფასი როგორ იქნება, ვერ გეტყვით, რადგან, გასულ წელს ღორის დაავადებამ კვლავ აქტიურად იჩინა თავი და საგრძნობლად იკლო სულადობის რაოდენობამ. ჩვენთანაც ნაკლები რაოდენობით შემოჰყავთ გოჭები, – გვეუბნებიან ოზურგეთის ბაზარში, შინაური ფრინველის და ცხოველების გაყიდვაზე მომუშავე ქალბატონები.
წყარო: gurianews.com