თბილისში, გურამიშვილის გამზირზე მდებარე 22 ჰექტარის ფართობზე არსებული “ელმავალმშენებლის” ქარხანა 19.5 მილიონ ლარად განმეორებით აუქციონზე “საქართველოს ბანკმა” შეიძინა.
ობიექტი აღსრულების ეროვნულმა ბიურომ პარასკევს ბანკის და სხვა კრედიტორების მიმართ არსებული გადაუხდელი ვალდებულების გამო გაყიდა.
“ელმავალმშენებლის” ქარხანა აუქციონზე გადაუხდელი ვალდებულებების გამო გამოვიდა. საქალაქო სასამართლოს 9 იანვრის განჩინებიდან ირკვევა, რომ ელმავალმშენებელ ქარხანას “საქართველოს ბანკის” მიმართ 15 მილიონი ლარის საკრედიტო დავალიანება აქვს, ასევე კომპანიას გააჩნია 20 მილიონის ვალი სხვა კრედიტორთა მიმართაც.
საქართველოს ბანკი აუქციონში მონაწილეობასთან და ობიექტის შეძენასთან დაკავშირებით BMG-ისთვის განმარტებას აკეთებს. ბანკის ინფორმაციით, აქტივი კრედიტორული ინტერესების დაცვის მიზნით შეისყიდეს.
“აღსრულების ეროვნული ბიუროს მიერ მოწყობილ საჯარო აუქციონზე, სს „ელმავალმშენებლის“ ქონების რეალიზაცია და მის საფუძველზე გამოცემული განკარგულება სრულ შესაბამისობაშია მოქმედი კანონმდებლობის ნორმებთან. იმის გათვალისწინებით, რომ მეორე განმეორებითი აუქციონის უშედეგოდ დასრულების შემთხვევაში, კრედიტორი – სს „საქართველოს ბანკი“ დაკარგავდა მოთხოვნის დაკმაყოფილების შესაძლებლობას, აუქციონზე მოვალის ქონება, კრედიტორული ინტერესების დაცვის მიზნით და კანონმდებლობის მოთხოვნათა სრული დაცვით, შეიძინა სს „საქართველოს ბანკმა“- ნათქვამია ბანკის მიერ მოწოდებულ განმარტებაში.
წყარო: bm.ge