ნებისმიერ ჩვენგანს საკუთარი ცხოვრების დაგეგმვასა თუ წარმართვაში თავადვე შეგვაქვს დიდი წვლილი. ამასთან, ნებისმიერ ადამიანს შეუძლია, თავის ბედში ცვლილება შეიტანოს, თუ ელემენტარულ წესებს გაითვალისწინებს და დაიცავს. უბრალოდ, ყველამ უნდა იცოდეს, რა არის მისთვის კარგი, რა გზით იაროს და მომავალში ხიფათს როგორ ასცდეს.
ტანსაცმელი, რომელიც ყოველდღიურად გვაცვია ან კარადაში გვაქვს და დროდადრო ვიზომავთ, უდიდეს მაგიურ თვისებებს ატარებს. თუმცა, ბევრისთვის ეს უცნობია. არადა, საკმარისია, გაიხსენოთ ის უიღბლო დღეები ან ბედნიერი წუთები, დაძაბოთ გონება და აღიდგინოთ რა გეცვათ მაშინ, შემდეგ ისევ ისე გამოწყობილი წახვიდეთ სამსახურში ან პაემანზე და მიხვდებით, რა ზეგავლენის მოხდენა შეუძლია ტანსაცმელს.
დააკვირდით, როცა წარსულში ბედნიერი იყავით და აწმყოში ზუსტად იმავე ტანსაცმლით გახვალთ, ნახავთ როგორ გაგიმართლებთ და იმ დღეს კვლავ ბედნიერების ზენიტში იგრძნობთ თავს. იმ ტანსაცმელში კი, რომელთანაც წარსულში მაინცდამაინც კარგი მოგონებები არ გაკავშირებთ, დღესაც არაკომფორტულად და წარუმატებლად იგრძნობთ თავს. ასე რომ, გაიხსენეთ თქვენი იღბლიანი დღეები – რა გეცვათ მაშინ და როცა ძალიან გაგიჭირდებათ, იგივე სამოსი ჩაიცვით. რასაკვირველია, თუ შემორჩენილი გაქვთ და არ გადაყარეთ ან გააჩუქეთ. შეიძლება, ის სამოსი წლების წინ გეცვათ და დღეს მოძველებული და არამოდურია, მაგრამ აბა, ჩაიცვით და დააკვირდით, რა დადებით გავლენას მოახდენს ის თქვენზე. ასეთი სამოსი დადებითი ემოციებით არის დამუხტული და ყოვლისშემძლე ძალა აქვს, რომელიც მიზნის მიღწევაში დაგეხმარებათ. მაგრამ, თუ ტანსაცმელი უსიამოვნო დღეებს გახსენებთ, ის უკვე აღარ არის თქვენი თილისმა და წარმატების მომტანი. არადა, თილისმის ძალა ხომ სწორედ ის არის, რომ ადამიანი ნებისმიერი უსიამოვნო და უარყოფითი განცდისგან დაიცვას ან იხსნას.
ასევე ყურადღებით უნდა დააკვირდეთ, ვინ რას გაჩუქებთ და რა განწყობით, რომ ამ ნივთმა თუ ტანსაცმელმა თქვენზე რაიმე ნეგატიური ზეგავლენა არ მოახდინოს და ბედ-იღბალი ცუდისკენ არ შემოგიტრიალოთ. კერძოდ, თუ არ ემეტება და უბრალოდ, იმიტომ გითმობთ, რომ იძულებულია, გაჩუქოთ, შესაძლოა ეს ნივთი თქვენთვის საბედისწერო აღმოჩნდეს და თქვენი ცხოვრება გააუარესოს.
ბევრს ჰგონია, რომ საგნები და ტანსაცმელი უბრალო ნივთებია. არადა, სწორედ საგნებსა თუ ტანსაცმელში ხდება ცუდი ზრახვების ტრანსფორმირება და ისინიც იმავე ენერგიას ასხივებენ, რასაც მისი ყოფილი პატრონი ავლენდა კონკრეტული ადამიანის მიმართ. ასე რომ, როგორი ძვირფასი ნივთიც არ უნდა მიიღოთ იმ ადამიანისგან, ვისაც გულზე არ ეხატებით, ეს საჩუქარი სამომავლოდ კარგს არაფერს გიქადით. თუ ასეთ ნივთს სხვას აჩუქებთ, ვინც იმ მჩუქებელს არ იცნობს, მაშინ უარყოფითი მუხტი ძალას კარგავს. ასე რომ, თუ სახლში მსგავსი ნივთები გაქვთ, სასწრაფოდ გააჩუქეთ და ნუ დაგენანებათ მათი სხვისთვის მიცემა.
წყარო: თბილისელები