ჯანდაცვის მინისტრის ეკატერინე ტიკარაძის განცხადებით, 8 ოქტომბერს, თბილისში დაგეგმილ საქართველო-ბელარუსის საფეხბურთო ნაკრებების მატჩზე თავშეყრა, ეპიდსიტუაციიდან გამომდინარე, რეკომენდირებული არაა.
მინისტრის განცხადებით, ამ ეტაპზე გადაწყვეტილი არ არის, დაიშვება თუ არა მატჩზე მაყურებელი. როგორც მან საკოორდინაციო საბჭოს სხდომის შემდეგ ჟურნალისტებს განუცხადა, კონკრეტულ გადაწყვეტილებას საბჭო მომდევნო დღეებში მიიღებს.
„დღეს ჩვენ ვისაუბრეთ რისკებთან დაკავშირებით, თუ რამდენად დიდი რისკი იმ შემთხვევაში, თუ საფეხბურთო მატჩი ჩატარდება, რამდენად დიდი იქნება გავრცელება. 8 რიცხვამდე საბჭო დამატებით შეიკრიბება და საბოლოო შედეგსა და გადაწყვეტილებაზე შევჯერდებით“, – განაცხადა ტიკარაძემ.
უეფას 2020 წლის ევროპის ჩემპიონატის საკვალიფიკაციო ეტაპის პლეი-ოფის ნახევარფინალის მატჩი, საქართველო-ბელარუსი 8 ოქტომბერს თბილისში გაიმართება.
საქართველოსა და ბელარუსის შეხვედრა 26 მარტს მარტს უნდა ჩატარებულიყო, თუმცა კორონავირუსის პანდემიის გამო გადაიდო. მატჩამდე ერთი თვით ადრე ყველა ბილეთი გაყიდული იყო.