“მეტრონომისთვის” ექსკლუზიურად ხდება ცნობილი, რომ ბადრი ესებუას დაკავება ნათესავის “ჩაშვებას” უკავშირდება.
როგორც წყარო ზუგდიდიდან გვატყობინებს, “საქართველოს ბანკზე” თავდამსხმელს ბოლო პერიდოში ნათესავი ფულს სძალავდა და აშანტაჟებდა.
ამასთან წყარო გვიყვება, რომ რამდენიმე კვირის წინ ესებუას ერთ-ერთ ნათესავთან ფიზიკური დაპირისპირება მოუვიდა, რადგან ამ უკანასკნელმა ფულის ნაწილი მოპარა.
ნათესავი, რომელმაც ბადრი ესებუას ადგილსამყოფელი გასცა, ზვიად ხარჩილავაა, რომელიც ციხეში იმყოფებოდა.
ხარჩილავა რამდენიმე თვის წინ სულ სხვა ბრალდებით დააკავეს.
ძარცვასა და მძევლების აყვანაში ბრალდებული, ბადრი ესებუა, რომელიც 2 წელი იმალებოდა, 8 თებერვალს, გამთენიისას დააკავეს. ესებუა ზუგდიდში იმ დროს დააკავეს, როდესაც ოკუპირებული აფხაზეთის რეგიონში გადასვლას აპირებდა. ის სოფელ ჯიხაშკარში აიყვანეს.
მსჯავრდებული ბადრი ესებუა პირდაპირ ციხეში გადაიყვანეს.
ზუგდიდში, „საქართველოს ბანკის“ ფილიალზე თავდასხმა 2020 წლის 21 ოქტომბერს მოხდა. შსს-ს ინფორმაციით, ყაჩაღური თავდასხმა ბადრი ესებუამ განახორციელა. თავდამსხმელს რამდენიმე საათის განმავლობაში მძევლად ჰყავდა აყვანილი 43 ადამიანი. გამოძიების ინფორმაციით, თავდასხმელმა ბანკიდან ნახევარი მილიონი დოლარის წაღება შეძლო.
საქმეზე გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით აღიძრა, რაც ტერორისტულ აქტს, ტერორისტული მიზნით მძევლად ხელში ჩაგდებას და ცეცხლსასროლი იარაღის უკანონოდ შეძენა-შენახვა-ტარებას გულისხმობს.