ტელეწამყვანმა რუსკა მაყაშვილმა ია ფარულასავს გადაცემაში – „ფარული კონვერტი“ – მშობიარობის შემდეგ განვითარებულ დეპრესიაზე ისაუბრა.
მისი თქმით, მეორე შვილის გაჩენის შემდეგ ბევრი პრობლემა აწუხებდა.
„დამემართა, მაგრამ რა დამემართა… ეს არ იყო უბრალოდ დასევდიანება. წინ ვეღარ ვიყურებოდი, ვეღარ ვხედავდი ჩემს თავს ვერსად. მიუხედავად იმისა, რომ სამსახურშიც გავედი, მივხვდი, რომ საერთოდ არაფერი აღარ მინდოდა დედამიწის ზურგზე. ერთადერთი, ბავშვები მაცოცხლებდა. ისე ცუდად ვიყავი, თავზარი რომ დაგეცემა. ვერ ვშველოდი ჩემს თავს, ვერავინ მეხმარებოდა. სანდრო ჩემ გვერდით იყო, ცდილობდა, რომ შეემსუბუქებინა და მადლობა მას ამისთვის. ერთი კვირა ისე გავიდა, არ მიძინია. მაქსიმალურად ვცდილობდი, რომ ეს ეკრანზე არ გამოჩენილიყო. დედაჩემი იშვიათად მაქებს, მაგრამ მითხრა, ყოჩაღ, არ გეტყობა, რომ ცუდად ხარო. ვერ წარმოვიდგენდი, რომ ოდესმე ასე ცუდად ვიქნებოდი. მერე მივედი ექიმთან, დამინიშნა მკურნალობა და ახლაც ვმკურნალობ“, – აღნიშნა რუსკა მაყაშვილმა.