ახლახანს ცნობილი ქართული მეცნიერების გამორჩეული წარმომადგენელი და ისტორიკოსი ზაზა ალექსიძე გარდაიცვალა. სამწუხარო ინფორმაცია სოციალურ ქსელში ვრცელდება.
“გარდაიცვალა ზაზა ალექსიძე – ქართული მეცნიერების გამორჩეული წარმომადგენელი – ისტორიკოსი, ფართო პროფილის წყაროთმცოდნე და ტექსტოლოგი, ქართული, სომხური და ალბანური პალეოგრაფიისა და ეპიგრაფიკის, ქრისტიანული კავკასიის ისტორიის, კულტურისა და რელიგიის მკვლევარი. ის წლების განმავლობაში სათავეში ედგა კორნელი კეკელიძის სახელობის საქართველოს ხელნაწერთა ეროვნულ ცენტრს, ხოლო ბოლო დრომდე – ხელნაწერთა ეროვნული ცენტრის სომხური და აღმოსავლური ხელნაწერების განყოფილებას.
ზაზა ალექსიძის სამეცნიერო ნაშრომები, რომლებიც გამორჩეულია პრობლემების მასშტაბური ხედვით, ფართო კვლევითი დიაპაზონით, მაღალი პროფესიონალიზმითა და სადა, ნათელი ქართულით, სამაგიდო წიგნებადაა ქცეული ჰუმანიტარიის სფეროში მომუშავე სპეციალისტებისათვის საქართველოსა და მის ფარგლებს გარეთ. ზაზა ალექსიძისათვის სამეცნიერო საქმიანობა იყო შემოქმედებითი პროცესი, რაც განსაკუთრებულ ხიბლს ჰმატებდა მის ნაშრომებს და ძლიერ იმპულსს აწვდიდა მკითხველებს.
ზაზა ალექსიძე თავისი პიროვნული მომხიბვლელობით, განსაკუთრებული ჰუმანიზმითა და ტოლერანტულობით, იუმორით, მიუკერძოებლობითა და პრინციპულობით, მუდამ დარჩება მისი ახლობლების, მოწაფეებისა და კოლეგების გულებსა და მოგონებებში”