საგარეჯოში, ტერიტორია, სადაც საზარელი თავდასხმა მოხდა, ახლაც ყვითელი ლენტით არის შემოსაზღვრული – ადგილობრივები შოკურ მდგომარეობაში არიან, მათ უჭირთ მძიმე ღამის შედეგებსა და მომხდარის დეტალებზე საუბარი.
ადგილზე ამ დრომდე გრძელდება საგამოძიებო მოქმედებები. ჰყვებიან, რომ მამაკაცი ესროდა ყველას, ვინც მის თვალთახედვის არეალში ექცეოდა.
5 ადამიანის მკვლელობის გარდა, ათუაშილმა დაჭრა კიდევ 5 ადამიანი. ერთ-ერთს ცოტა ხნის წინ “კურიერი” ვიდეოზარის მეშვეობით ესაუბრა. ვალერი მათიაშვილი “ჯეო ჰოსპიტალსში” მკურნალობს. ამ ეტაპზე, მისი ჯანმრთელობის მდგომარეობა სტაბილურია.
ახალგაზრდა მამაკაცი ჰყვება, რომ ათუაშვილმა პოლიციელსაც დამიზნებით ესროლა და სწორედ ამ ეპიზოდში მიიღო დაზიანება კიდევ ერთმა ადამიანმა.
თავად მათიაშვილმა კი ჭრილობის არსებობა მას შემდეგ აღმოაჩინა, როდესაც შემთხვევის ადგილს ოდნავ გასცდა და თავის დაღწევა მოახერხა, რომ თავადაც არ გამხდარიყო მსხვერპლი. ვალერი მათიაშვილი იმ ემოციების შესახებ ჰყვება, რაც იქ მცხოვრებმა ადამიანებმა განიცადეს.
“მაღაზიაში შევედი, სიგარეტი ვიყიდე და გამოვედი. როგორც კი გამოვედი გარეთ დამხვდა ის ამბავი, რომ ბევრი ხალხი იყო, ალბათ 10-მდე ადამიანი მორბოდა, ყვიროდა. იძახდნენ, რომ დაწექითო ან დაიმალეთო. პირველი, რაც გავაკეთე, თავშესაფრის მოძებნა დავიწყე და შევედი შიგნით ჩემი თანამშრომლის გადასარჩენად, რომ ის გამეყვანა უსაფრთხო ადგილას. შევედი თუ არა კარებში ხმა გავიგე და წვაც მაშინვე ვიგრძენი ტყვიის მოხვედრის.
ჩემი თანამშრომლის კივილი იყო “ვაიმე თვალიო” და მაგ მომენტში ავდექი, მოვკიდე ხელი, გავედით გარეთ, უსაფრთხო ადგილას გადავედით, სადაც ვიყავით 10-15 წუთის განმავლობაში, სანამ მოვახერხებდით ჩვენი ძალებით ევაკუაციას, იმიტომ, რომ იქ სასწრაფოს მოსვლა შეუძლებელი იყო, ვინც მოდიოდა – პოლიცია მოვიდა და ესროლა… უმართავი იყო სიტუაცია, შეუძლებელი იყო იქ ვინმეს ჩარევა გარედან. დამიზნებით ისროდა, იმიტომ, რომ პოლიციელიც ადგილზევე დაიღუპა, ალბათ წინასწარ იცოდა, სადაც უნდა ესროლა,” – ამბობს ვალერი მათიაშვილი.