დუშეთის მუნიციპალიტეტის სოფელ ბისოსთან, შატილის გზაზე მიკროავტობუსი 80 მეტრიდან ხევში გადავარდა, რის შედეგადაც 17 ადამიანი დაიღუპა, 3 კი მძიმედ დაშავდა.
თვითმხილველი, რომელიც ტრაგედიის ადგილზე ერთ-ერთი პირველი ჩავიდა და სამაშველო სამუშაოებში მიიღო მონაწილეობა AMBEBI.GE-ს ესაუბრა.
“შემთხვევის ადგილზე, ხევში რომ ჩავედი, საშინელი სურათი დამხვდა. მიკროავტობუსი დაახლოებით 100 მეტრის სიმაღლიდან გადავარდა, მგზავრებიდან 17 ქალია, 3 – მამაკაცი. ოციდან ერთი კანადის მოქალაქე ყოფილა, რომელიც ზუსტად არ ვიცით, საიდან მოვიდა, მათ დაემგზავრათ, თუ რა მოხდა.
მერსედესის “სპრინტერის” მიკროავტობუსი სისწრაფით მიდენილა, შემდეგ მუშების გაჩერებულ და ცარიელ მანქანას დასჯახებია და ისიც გადაუგდია ხევში. ამ 20-დან 4 ცოცხალი ამოვიყვანეთ და ერთი მალევე გარდაიცვალა.
მთლიანობაში, 20 მგზავრიდან სამია გადარჩენილი. ერთი ქალბატონი იყო კონტაქტური და მხოლოდ იმას ამბობდა, მტკივა, ნელაო. მგზავრებს შორის მცირეწლოვნები არ ყოფილან, ყველანი 30 წლამდე ასაკისანი არიან. ბისოსთან ეს მოსახვევი სახიფათოა და იქ სწრაფად სიარული დაუშვებელია. ახლა მაშველები მუშაობენ ადგილზე, მუშების მანქანა ხეებშია გაჩხერილი და ის ამოჰყავთ თოკებით”, – უყვება ambebi.ge-ს თვითმხილველი.