სოციალურ ქსელში, ემიგრანტების ჯგუფებში ქართველი ემიგრანტი ქალის, გვარად იოსებაშვილის ემოციური წერილი ვრცელდება.
ქალის ტკივილი ბევრი ემიგრანტის საერთო სატკივარი აღმოჩნდა.
სტატუსს უცვლელად გთავაზობთ:
,,მორჩა! ახლა ხელფასს რომ ავიღებ, ყოველ თვეში 100 ევროს გადავდებ, რომ მალე წავიდე… ასე ვიმეორებ უკვე 12 წელია და ახლა საფულეში ზუსტად 10 ევრო და რაღაც ხურდები მიყრია… არასოდეს დამითვლია ხელფასი… იმდენად უღიმღამოა ეს პროცესი ჩემთვის… თითქოს მივეჩვიე, რომ მაინც არაფერი დამრჩება… წლები გადის… 28 წლის გოგო ვიყავი და ახლა 41 წლის ქალი ვარ…
ღამე ისევ ძველებურად არ მძინავს და გათენება ისევ ისე მეზიზღება…
თუ ვინმეს ჰგონია, რომ ემიგრანტობა სიმდიდრეა და ყელამდე ფული, ცდებით.
აქ წესიერი შრომით ძალიან დიდხანს უნდები იმ ყველაფრის გაკეთებას, რისთვისაც წამოხვედი… მეორადებში ნაყიდი ტანსაცმლით ცდილობ, ცოტა მაინც შეაფხიზლო შენს სულში მიძინებული ქალი… ასაკთან ერთად გამოტოვებული ყველა დღის გამჩენი ვატირე… როცა ჩემი დღეები ერთმანეთს ისე ჰგვანან, რომ მკითხო, რა იყო გუშინ ან გუშინწინ, ისევ იმ ამბებს მოგიყვები, რაც ერთი თვის წინ მოგიყევი…
10 ევროს და ხურდებს დავხედე და მწარედ გამეღიმა. ამ ყველაფრისთვის, რაც დღეს მაქვს, ჩემი ცხოვრების საუკეთესო წლები დავკარგე”, – წერს ემიგრანტი ქალი.