პოლიტიკური გაერთიანება „ქართული ოცნება-დემოკრატიული საქართველოს” ლიდერი, ბიძინა ივანიშვილი შატილში მომხდარი ავტოსაგზაო შემთხვევისას დაღუპულთა ოჯახებს უსამძიმრებს.
„შემძრა შატილში დატრიალებულმა ტრაგედიამ. განუზომელია ჩვენი მოქალაქეების დაღუპვით გამოწვეული მწუხარება და ტკივილი. ვუსამძიმრებ დაღუპულების ოჯახებს და მთელ საქართველოს“, – აღნიშნულია ბიძინა ივანიშვილის განცხადებაში.
შატილის გზაზე ავარიის შედეგად 17 ადამიანი გარდაიცვალა, სამის მდგომარეობა კი უკიდურესად მძიმეა.
სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო.
სამაშველო სამუშაოები შინაგან საქმეთა მინისტრის მოადგილისა და საგანგებო სიტუაციების მართვის სამსახურის უფროსის უშუალო ხელმძღვანელობით განხორციელდა.
შატილის გზაზე მომხდარი ტრაგედიის გამო, „ქართულმა ოცნებამ“ 24 და 25 აგვისტოს შიდა ქართლში დაგეგმილი მაჟორიტარი დეპუტატობის კანდიდატების წარდგენა გადადო.