15 აგვისტოს გამთენიისას, “დედაენის ბაღში” მდებარე “ბაუჰაუს ბარის” ორი თანამშრომელი – გიორგი შალამბერიძე და ბაია ბერუაშვილი გაუჩინარდა. მათი კვალი იუსტიციის სახლთან იკარგება.
მომხდართზე დაკავშირებით დეტალებზე არ ლაპარაკობენ არც გაუჩინარებული ახალგაზრდების ოჯახები და არც სამსახურის თანამშრომლები.
„ამბები“ ბაია ბერუაშვილის მეგობარს დაუკავშირდა:
“ბაია, ქუთაისში გაიზარდა, შემდეგ თბილისში გადმოვიდა დედასთან ერთად და ჯავახიშვილის სახელობის უნივერსიტეტის ფსიქოლოგიური ფაკულტეტი დაამთავრა. ჩემი მეგობარი 28 წლისაა, ძალიან სერიოზული და კარგი გოგოა, სიმშვიდისა და სითბოს განსახიერება, ამდენ ხანს ახლობლებს არ ანერვიულებდა. როგორც ვიცი, მათ შორის არანაირი სიყვარული და არაფერი ყოფილა, ჩვეულებრივი თანამშრომლები არიან. გამთენიისას ბარიდან ორივე ერთად გასულა მაღზიაში, ვერცხლის ქუჩაზე, მაგრამ გამყიდველი არ ადასტურებს, რომ ნახა ისინი.
კანონით, 48 საათის მერე იწყებენ ძებნასო და იქნებ როგორ უჭირთ? იქნებ ვინმემ რაღაც დაალევინათ, გათიშულები არიან და სასწრაფო სჭირდებათ? საინტერესო ისაა, რომ ორივემ საკუთარი ჩანთა და მობილური ბარში დატოვა.
იმ ბიჭზე, გიორგიზე ბევრი არაფერი ვიცი, უბრალოდ ის, რომ თანამშრომელი იყო. მასაც კარგად ახასიათებენ, მშვიდი, წყნარი ბიჭიაო – ამბობენ. თანამშრომლები გატაცებას გამორიცხავენ… რა გითხრათ, არანაირი ვერსია არ მაქვს. სხვაზე და სხვა სიტუაციაში ვიფიქრებდი, სადმე ხომ არ წავიდნენ, დალიეს, ან მოწიეს და ხომ არაფერმა აწყინათ და გაითიშნენ-თქო. ახალგაზრდებზე სხვა რა უნდა იფიქრო?”” – აღნიშნა მან.