გარდაცვლილი თამარ ბაჩალიაშვილის ოჯახის ადვოკატის განცხადებით, ბოლო პერიოდში მას და მის ოჯახს ემუქრებიან. თუმცა, მიუხედავად ამის, არსად წასვლას არ აპირებს. მიხეილ რამიშვილი ითხოვს მისი ოჯახის უსაფრთხოების დაცვას. ამის შესახებ მან TV პირველის ეთერში განაცხადა.
“მე საელჩოებს მივაწოდე ინფორმაცია მუქარაზე. ისევ დატრიალდა ტროლები, ბოტები და გარკვეული პირების ძალიან ცუდი კომენტარები. მე არსად წასვლას არ ვაპირებ, არანაირი პოლიტიკური თავშესაფრის მოთხოვნა არ მჭირდება საზღვარგარეთ არც მე და არც ჩემი ოჯახის წევრებს. ეს თქვენ გჭირდებათ და მგონი, თქვენ გექნებათ გასაქცევი გზა, სხვებს დასჭირდებათ თავშესაფარი” – განაცხადა მიხეილ რამიშვილმა.
შეგახსენებთ, რომ თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი სათვალთვალო კამერებმა ბოლოს თეთრიწყაროს რაიონში დააფიქსირეს. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს.
ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.