მოსკოვში სასამართლომ 4 წლით დააპატიმრა ადგილობრივი დეპუტატი ქეთევან ხარაიძე, რომელსაც გამოძალვას ედავებოდნენ. ხარაიძე ბრალდებას უარყოფს და სისხლისსამართლებრივ დევნას პოლიტიკური მოტივებით ხსნის.
გარდა პატიმრობისა, ტვერსკოის სასამართლოს გადაწყვეტილებით ხარაიძემ ჯარიმა უნდა გადაიხადოს 700 000 რუბლის ოდენობით. მას ასევე დაეკისრა 5 მილიონი რუბლის გადახდა მოსარჩელის სასარგებლოდ და აეკრძალა საჯარო თანამდებობების დაკავება გათავისუფლებიდან 2 წლის განმავლობაში.
სასამართლო პროცესზე სააგენტო SOTA-ის მიერ გადაღებულ კადრებში ჩანს, როგორ ადებენ ბორკილებს დეპუტატს განაჩენის გამოცხადებისთანავე.
Current Time-ის მიხედვით, ტვერსკოის რაიონის დეპუტატი ქეთევან ხარაიძე მის წინააღმდეგ სისხლისსამართლებრივ დევნას უკავშირებს მცდელობას, მონაწილეობა მიეღო 2021 წლის სახელმწიფო დუმის არჩევნებში.
64 წლის ხარაიძე, რომელსაც BBC-ის რუსულენოვანი გამოცემა მოსკოვის ერთ-ერთ ყველაზე ცნობილ დეპუტატად მოიხსენიებს, პოლიციამ გასული წლის 17-18 ივნისის ღამით დააკავა. 1 თვით ადრე მას გაცხადებული ჰქონდა, რომ დუმის არჩევნებში აპირებდა მონაწილეობას.