თამარ ბაჩალიაშვილის კომპიუტერიდან ამოღებულია 184 886 ფოტო და 480 ვიდეო, – ამის შესახებ “ინფო რუსთავს” 23 წლის თამარ ბაჩალიაშვილის ოჯახის ადვოკატმა, მიხეილ რამიშვილმა განუცხადა.
რამიშვილის ინფორმაციით, ბაჩალიაშვილის პირადი კომპიუტერიდან ამოღებული არ არის მიმოწერები. რაც შეეხება, ე.წ. “მაღალჩინოსნების ვერსიას”, ადვოკატი აცხადებს, რომ აღნიშნულთან დაკავშირებით, კომპიუტერში მასალა ნაპოვნი არაა. მეტიც, ადვოკატის თქმით, კომპიუტერში “არანაირი სხვაგვარი ფაილები არ არსებობს”.
ასევე, მიხეილ რამიშვილის განცხადებით, არ მომხდარა ბაჩალიაშვილის Facebook-ში შეღწევა. ექსპერტიზის თანახმად, თამარ ბაჩალიაშვილი პირად კომპიუტერში ბოლოს 18 ივლისს, 10:02 საათზეა შესული.
თამარ ბაჩალიაშვილის ოჯახის ადვოკატი მიხეილ რამიშვილი ექსპერტიზის ეროვნულ ბიუროში დღეს, 4 აგვისტოს გაეცნო გარდაცვლილის პირადი კომპიუტერის კლონირებისა და დეშიფრაციის დასრულების შემდეგ მიღებული ექსპერტიზის შედეგებს. ადვოკატის თქმით, ის ჯერჯერობით ფოტო და ვიდეომასალას სრულად არ გაცნობია.