სოციალურ ქსელში სპექტაკლი “დემონები” დიდი განხილვის საგანი გახდა, რადგან “პოსტივის” ჟურნალისტმა ნათია ბერიძემ ძველი დადგმის სცენიდან კახა კინწურაშვილისა და თორნიკე გოგრიჭიანის კოცნის ეპიზოდი გაავრცელა. ამ ფრაგმენტმა და ბერიძის ქმედებამ მსახიობი კახა კინწურაშვილი ბულინგის ობიექტად აქცია.
რას ემსახურებოდა სინამდვილეში კინწურაშვილის წინააღმდეგ მიზანმიმართული აგრესიის წარმოება – თავის დროზე მსახიობმა და წამყვანმა “იმედის” პირდაპირ ეთერში ხელისუფლების წინააღმდეგ კრიტიკული განცხადება გააკეთა, რაც ბევრისთვის მოულოდნელი აღმოჩნდა – სახელისუფლებო მედიისთვის არადამახასიათებელი კომენტარის მოსმენას ამავე ტელევიზიის წამყვანისგან არავინ ელოდა. თუმცა, თავდასხმა კინწურაშვილის წინააღმდეგ მაშინვე არ დაწყებულა, რადგან “ოცნების” ტროლ-ბოტების სქემა მარტივად გაიშიფრებოდა. ახლა კი მეორე სახელისფლებო მედიის ჟურნალისტმა საკუთარ თავზე აიღო მსახიობის წინააღმდეგ წამოწყებული კამპანია და თავიც მშვენივრად გაართვა.
ნათია ბერიძე “პოსტივის” ჟურნალისტია და სახელისუფლებო წარმომადგენლობასთან საკმაოდ კარგ ურთიერთობაში იმყოფება. მან ორი წლის წინ ენმ-ს ლიდერის ნიკა მელიას წინააღმდეგ სასამართლოში ჩვენება მისცა და ამტკიცებდა, რომ გაიგო, თუ როგორ მოუწოდებდა ოპოზიციის ლიდერი ხალხს ამბოხისკენ. მიუხედავად იმისა, რომ ბერიძე პარალელურად ლაივ-ჩართვას უზრუნველჰყოფდა და უწყვეტი ეთერი ჰქონდა სოციალურ ქსელში, ჩანაწერში კი მელიას მოწოდება არ ისმინებოდა, ჟურნალისტი მაინც ამტკიცებდა, რომ ნიკა მელიას სახელმწიფო გადატრიალება ჰქონდა ჩაფიქრებული.
ადვოკატების ინფორმაციით, ჟურნალისტი ნათია ბერიძე სოციალურ ქსელ „ფეისბუქში“ ერთ-ერთი გვერდის ადმინისტრატორი იყო, აღნიშნული გვერდი კი, ყალბი ინფორმაციის გავრცელებას ემსახურებოდა.
ნათია ბერიძის “ოცნების” ტროლ-ბოტებთან კავშირს სოციალურ ქსელში აქტიურად განიხილავენ, თავად ჟურნალისტი კი საკმაოდ უხეშად აფიქსირებს საკუთარ პოზიციას და მისგან განსხვავებული აზრის ავტორებზე თავდასხმასაც არ ერიდება. სწორედ ამიტომ აკრიტიკებენ მას სოციალური ქსელის მომხმარებლები და ღიად ადანაშაულებენ “ოცნების” აგიტატორობაში.