სიღარიბის ზღვარს ქვემოთ მყოფი დედა და არასაკმარისი თანხა შვილების გამოსაკვებად. გიყვებით მარტოხელა ქალის ისტორიაზე, რომელმაც ეკონომიკური სიდუხჭირის გამო, ერთი შვილი ყოფილი ქმრის ოჯახში დატოვა, მეორე მცირეწლოვანს კი საკვებით სრულფასოვნად ვერ უზრუნველყოფს. ახალგაზრდა მშობელს ახლა ყველაზე მეტად იმის ეშინია, რომ სუსხიან ზამთარში შვილს ჯანმრთელობის პრობლემები არ შეექმნას, რადგან მისთვის სამედიცინო დახმარების გაწევას ვერ შეძლებს.
სალომე გოგოლიძეს ახალი წლის მოახლოება სიდუხჭირის მიზეზით არ უხარია. მარტოხლა დედა ყვება, რომ თანხა პატარების გამოსაკვებადაც კი არ აქვს. უსახსრობის გამო, ხშირად, მშივრები იძინებენ. სადღესასწაულოდ შვილებს ნუგბარსაც ვერ ჰპირდება, რომ არაფერი ვთქვათ, საჩუქრებსა და სათამაშოებზე.
იმის გამო, რომ ბავშვების სრულფასოვნად გამოსაკვებად საკმარისი ფინანსები არ აქვს, უფროსი შვილის დატოვება ყოფილ დედამთილთან მოუხდა. მის წაყვანას თავისთან, სალომე, მხოლოდ, მაშინ ახერხებს, როცა ვინმე დაეხმარება და შვილის საკვებით უზრუნველყოფა შეუძლია.
ქირით მცხოვრები 26 წლის მარტოხელა დედის ერთადერთი შემოსავალი სოციალური დახმარებაა. 300 ლარიდან 250 ლარი სახლის ქირისა და კომუნალური ხარჯებისთვის ეხარჯება. დარჩენილი 50 ლარი კი, არაფერში ჰყოფნის. მცირეწლოვანი პატარასთვის ასაკის შესაბამისი საკვებისა და საფენების შეძენასაც კი ვერ ახერხებს. შიშობს, რომ ახალი წლიდან ეს დახმარებაც, საცხოვრებელი ქალაქის ცვლილების გამო, შეუწყდება.
უკიდურესად გაჭირვებულ დედას ცხოვრება მძიმე პირობებში უწევს. არ აქვს საყოფაცხოვრებო ტექნიკა. გამათბობელიც გაუმართავია.
სალომე გოგოლიძესა და მის მცირეწლოვან შვილებს, ახლა, მხოლოდ, კეთილი ადამიანების იმედი აქვთ. მისთვის ფინანსურთან ერთად, სურსათით, ბავშვის მოვლის საშუალებებითა და ტანსაცმლით დახმარებაც მნიშვნელოვანია.
წყარო: tv25.ge