ხორავას ტრაგედიიდან ხუთი წელი გავიდა – დღემდე არ აღსრულებულა სამართალი ბოლომდე, დღემდე ბუნდოვანია საქმე, დღემდე არ აღძრულა საქმე იმ სამართალდამცველებზე, რომლებმაც საქმე გააყალბეს, დღემდე არ დამდგარა იმ პოლიტიკოსების პასუხისმგებლობის საქმე, რომლებმაც საჯარო, თუ არასაჯარო საუბრებში, ხელი შეუწყვეს საქმის გაყალბებას.
გთავაზობთ, დათუნა სარალიძის დედის ინტერვიუს:
“არ ვიცოდი, როგორ დამეწყო, რა მეკითხა და როგორ მეკითხა. ვსაუბრობდით ნაწყვეტ-ნაწყვეტ.
ზოგჯერ ვერც ის იღებდა ხმას, ვერც – მე. სრული სიჩუმე იდგა ოთახში ზოგჯერ და ყველაზე რთული მოსასმენი ეს სიჩუმე იყო. სიჩუმეს და სიჩუმეს შორის მოსმენილს გადმოვცემ, სიჩუმეს ვერა, არ შემიძლია იმ შეგრძნების გადმოცემა, როცა თავჩახრილი იჯდა, თითებს აწვალებდა, დუმდა და ყველა უჯრედით რაღაცას მეუბნებოდა თან, რაღაცა იმდენად საშინელს, რომ თითოეული უჯრედი მეწვოდა.
…მახსოვს, სამძიმარზე მოსული მასწავლებლებიდან ერთმა მითხრა – შენი შვილი ყველამ მიატოვა, ყველა გაიქცაო… – ეს სიტყვები მახსოვს. ხშირად მიფიქრია მერე ამ სიტყვებზე… დათუნა არ დატოვებდა, არასოდეს არავის დატოვებდა გაჭირვებაში…” , – უთხრა “ალიას” დათუნას დედამ.