„ფორმულა კრეატივის” შემოქმედებითი ჯგუფი დღეს პირველად შეიკრიბა და „ხელოვნურის სუნთქვის” გადაღების დაწყება დაგეგმა. სერიალის ფეისბუქ გვერდზე შეხვედრის ამსახველი ფოტო გაზიარდა.
მაშ ასე, ექვსწლიანი პაუზის შემდეგ, „ხელოვნური სუნთქვა” მესამე სეზონით ბრუნდება.
სერიალს ამჯერად ონლაინ კინოთეატრ Cavea + -ზე ვიხილავთ.
“ხელოვნური სუნთქვის” მსახიობებს ლევან ყოჩიაშვილი შეუერთდა.
ლევან ყოჩიაშვილი: სცენარი მზადაა, ჩვენ ვემზადებით. სერიალის ეს სეზონი Cavea + ის დაკვეთით უნდა გადავიღოთ, შესაბამისად ყველაფერს ისინი წყვეტენ, როდის გავა და ასე შემდეგ.
ჯერ ვერ გეტყვით, რა როლს ვთამაშობ. თან ვლაპარაკობ, თან ვერ ვლაპარაკობ. გაგიმხელთ იმას, რომ ამ სერიალში ჩემთვის საყვარელი მსახიობები თამაშობენ. “ხელოვნური სუნთქვის” მაყურებელი გახლდით, მომწონდა, ვგულშემატკივრობდი. მსიამოვნებს ეს სიახლე ნამდვილად.
რუსკა ქარქაშაძე: – დიდი ხანი ველოდი ამ სერიალის გაგრძელებას. სულ მქონდა იმედი, რომ ისევ აღმოვჩნდებოდი “ხელოვნური სუნთქვის” გადასაღებ მოედანზე. სულ მიდიოდა ამაზე საუბარი. როგორც იქნა, ვაგრძელებთ გადაღებას. ბევრი ახალი პერსონაჟი გვეყოლება, ბევრი ახალი ამბავი მოხდება. მე მგონი, ძალიან საინტერესო უნდა იყოს. წინა სეზონებზეც არა ნაკლებ საინტერესო. ახალი სცენარი ბევრი ახლის გაკეთების საშუალებას მაძლევს. იმ კვირიდან ვიწყებთ და გვიხარია ყველას.
ეკა დემეტრაძე: – გულწრფელი რომ ვიყო, აღარც ველოდი, რომ გაგრძელდებოდა. მაგრამ აი, დავიწყეთ და ძალიან გამიხარდა. ჩემთვის ჩემს პერსონაჟზე მუშაობა ძალიან საინტერესო იყო. კიდევ უფრო საინტერესოა თავიდან გაცოცხლება და ახალი ცხოვრების დაწყება. რთულია და მეტი პასუხისმგებლობაა. მოლოდინი თითქოს უფრო მეტია, ვიდრე ახალზე. დიდი ამბავი მოჰყვა ნიუსს, რომ სერიალი უნდა გაგრძელებულიყო. მივხვდით, რომ დიდია მოლოდინი.
სცენარის ნაწილი, რაც წავიკითხე ძალიან საინტერესოა. ბევრი ხაზი და პერსონაჟი შემოდის. ახალი ეტაპი ჩემს კარიერაში ძალიან მახარებს.
წყარო: “პრაიმტაიმი”