ხვიჩა კვარაცხელიას თანაგუნდელი, ვიქტორ ოსიმენი მძიმე ბავშვობას იხსენებს. ნიგერიელი ვარსკვლავი ოჯახის გამოსაკვებად საცობებში მანქანებს შორის დარბოდა წყლის ბოთლებით ხელში და მძღოლებს მათ ყიდვას სთხოვდა.
“დედაჩემის გარდაცვალებიდან სამი თვის შემდეგ, მამამ სამსახური დაკარგა და ეს ჩვენი ოჯახისთვის უმძიმესი პერიოდი იყო. ჩემი ძმა სპორტულ გაზეთებს ყიდდა, და – ფორთოხალს, ხოლო მე – წყალს. ლაგოსში, ქუჩაში, მანქანებს შორის დავდიოდით და მძღოლებს მათ ყიდვას ვთავაზობდით..”- განაცხადა ოსიმენმა.
ოსიმენის თქმით, ის მუდმივად ეძებდა გზებს, რომ თავი დაეღწია ასეთი ცხოვრებისთვის, უბრალოდ ეცხოვრა ისე, რომ საჭმლის ფული ჰქონოდა, მიეღო განათლება. იმისთვის, რომ ტანსაცმელში ფული დაეზოგა, ნაგავსაყრელზე დადიოდა – იქ პოულობდა სამოსსა და ფეხსაცმელებს.
ოსიმენმა ლაგოსში, Ultimate Strikers Academy-ში დაიწყო ვარჯიში. მისი საფეხბურთო მონაცემები მალევე შეამჩნიეს. 15 წლის ოსიმენი 17-წლამდელთა ნაკრების მთავარი ძალა გახდა. ვიქტორ ოსიმენის ევროპული კარიერა გერმანულ კლუბ “ვოლფსბურგში“ თამაშით დაიწყო.მოგვიანებით ფეხბურთელით ფრანგული კლუბი, “ლილი” დაინტერესდა , “ლილში” გატარებული პერიოდიც წარმატებული იყო, მალევე ყველა ტურნირზე კლუბის საუკეთესო ბომბარდირი გახდა,18 გოლით.
მალევე ოსიმენით ნაპოლიც დაინტერესდა. მათ ფორვარდში “ნაპოლისთვის” რეკორდული თანხა, 80 მილიონი დოლარი გადაიხადეს. 2020 წელს ვიქტორი იქცა ყველა დროის ყველაზე ძვირადღირებულ აფრიკელ ფეხბურთელად.
ოსიმენი ხშირად ჩადის სამშობლოში და ადგილობრივებს ეხმარება.