ვიმედოვნებ, საქართველოს ხელისუფლება იპოვის ძალას, საბოლოოდ ჩამოანგრიოს რევანშისტების გეგმები, რომლებიც ქვეყნიდან გაძევებულ ექსპრეზიდენტთან ერთად, დემოკრატიის განადგურებას ცდილობენ, – ამის შესახებ რუსეთის დუმის დეპუტატი, სერგეი გავრილოვი აცხადებს.
20 ივნისის სისხლიანი მოვლენებიდან ერთი წლის შემდეგ, გავრილოვი ვიდეომიმართვას ავრცელებს. ამბობს, რომ რუსეთთან ურთიერთპატივისცემაზე დაფუძნებული ურთიერთობის აღდგენა ქართველი ხალხის ინტერესებშია, შესაბამისად, მიიჩნევს, რომ საქართველოს მხრიდან ბოდიშის მოხდა სწორი ნაბიჯი იქნებოდა.
მჯერა, რომ ჩვენთვის ახლობელი ქვეყნის, საქართველოს ხელისუფლებას რიგითმა მოქალაქეებმა, ქვეყანაში წესრიგის დამყარების შესაძლებლობა უნდა მისცენ. უნდა შეაჩერონ ისინი, ვინც შარშან სახელმწიფო გადატრიალებას ანტიმართლმადიდებლური, ანტიქრისტიანული და რუსოფობიური ლოზუნგებით აწყობდა. ჩვენ არ მოვითხოვთ პატიებას, თუმცა ვფიქრობთ, რომ ასამბლეის მონაწილე დეპუტატებისთვის, რუსეთისთვის და რუსეთის პრეზიდენტისთვის, რომელსაც შეურაცხყოფა მიაყენეს, ბოდიშის მოხდა აუცილებელია. პოლიტიკური ურთიერთობის აღდგენისთვის ეს წინაპირობაა, აუცილებელია სიმამაცე დიპლომატიური ურთიერთობების აღდგენისთვისაც, – ამბობს გავრილოვი.
შეგახსენებთ, რომ 2019 წლის 20 ივნისს საზოგადოების პროტესტი სწორედ სერგეი გავრილოვის საქართველოში ვიზიტს მოჰყვა.