რადგან ვირუსი თავისი ბუნებით შეუცნობელი და ვერაგია, ის შეიძლება ნებისმიერ დროს შემოგვიბრუნდეს, – ამის შესახებ იმუნოლოგ-ალერგოლოგმა, ბიძინა კულუმბეგოვმა „რუსთავი 2“-ის ეთერში განაცხადა.
მისივე თქმით, შეზღუდვების შემსუბუქების ფონზე თუ მოქალაქეებმა რეკომენდაციები არ შეასრულეს, სცენარი შეიცვლება და ეპიდაფეთქების ახალი ტალღა გარდაუვალი იქნება.
„ამის მაგალითია სამხრეთ კორეა და გერმანია. ახალი შემთხვევები უჰანშიც დაფიქსირდა, ამიტომ ჩვენ ძალიან სწორად და ზუსტად უნდა გავიაზროთ, რომ სახელმწიფოს უჭირავს ბერკეტი და შეიძლება კარანტინის რეჟიმი უკან დააბრუნოს“, – აღნიშნა კულუმბეგოვმა.
საქართველოში კორონავირუსი 638 ადამიანს დაუდასტურდა, აქედან 317 უკვე გამოჯანმრთელდა, 11 ადამიანი კი გარდაიცვალა.