რუსთავის სამშობიაროს დირექტორი მზად არის გაყიდული ბავშვების საქმეზე გამოძიებას ჩვენება მისცეს – ალექსანდრე ბარავკოვი “პირველების” კამერასთან გამოჩნდა.
მედიკოსი ბრალდებებს უარყოფს, ამბობს რომ მის წინააღმდეგ მტკიცებულებები არ არსებობს და არც გამოძიებას აქვს.
“არანაირი ფაქტი არ არსებობს, მე არ ვიცნობ ნინი მოხევიშვილს. დაველოდოთ მოვლენებს. შეიძლება ხუმრობით ვთქვი, რომ 90-იან წლებში ასეთი რამ (ბავშვთა გაყიდვა) ხდებოდა. აბსოლუტურად არაფერი ხდებოდა. ყველაფერი გაირკვევა. აქ მენეჯმენტი შეცვლილია, მე არავინ ვარ – მე ვარ ერთი ექიმი-კონსულტანტი”- განაცხადა მედიკოსმა.
“პირველების” ინფორმაციით, რუსთავის სამშობიაროს დირექტორი გაყიდული ბავშვების საქმეზე გამოკითხვაზე დაიბარეს. ბარავკოვმა ჩვენება ცენტრალურ კრიმინალურ პოლიციაში უნდა მისცეს.
ცნობისთვის, ალექსანდრე ბარავკოვს ჩვილების გაყიდვაში ადანაშაულებენ. ერთ-ერთი ვინც მედიკოსის წინააღმდეგ ტელეკამერების წინ ალაპარაკდა, ნინი მოხევიშვილია. მისი თქმით, წლების წინ რუსთავის გზატკეცილზე გაიყიდა. აღმზრდელმა დედამ მას მხოლოდ 18 წლის შემდეგ გაუმხილა, რომ ნაშვილებია და ის რუსთავის სამშობიარო სახლიდან წამოიყვანა. მოხევიშვილის მტკიცებით, მაშინ აღნიშნული სამშობიარო სახლის დირექტორი ალექსანდრე ბარავკოვი იყო, რომელმაც ბიოლოგიურ დედას შვილი მოჰპარა და ათას დოლარად გაყიდა.
ბნელი 90-იანებიდან 2005 წლამდე გაყიდული ბავშვების ამბავზე აქტიური საგამოძიებო მოქმედებები კრიმინალურმა პოლიციამ დაიწყო.
წყარო: “newposts.ge”