საქართველოში საგანგებო მდგომარეობა გახანგრძლივდა. შესაბამისი გადაწყვეტილება პრემიერ-მინისტრის ხელმძღვანელობით კორონავირუსთან დაკავშირებით მოქმედმა უწყებათაშორისმა საკოორდინაციო საბჭომ დღევანდელ სხდომაზე მიიღო.
როგორც გიორგი გახარიამ განაცხადა, მთავრობამ პრეზიდენტს შესაბამისი ინიციატივით მიმართა. მისივე თქმით, კორონავირუსის გამო დაწესებული შეზღუდვები ქვეყანაში 10 მაისამდე იმოქმედებს.
საქართველოში კორონავირუსი 296 ადამიანს დაუდასტურდა, მათგან 69 გამოჯანმრთელდა, 3 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა.