თურქეთში ქმრის მიერ მოკლული 23 წლის რიტა ეგნატაშვილის დედის თქმით, ბრალდებულმა შაქრო აბესლამიძემ მისი შვილი წინასწარ განზრახვით, წამებით მოკლა.
“ორი დღის მკვდარი იყო… დამირეკეს მისმა მშობლებმა, ავარიაში მოყვაო. ავარიაში კი არა, მოკლული ჰყოლია ჩემი შვილი და არ ვიცოდი. ჯერ აწამა, ნაცემია, დალურჯებული ჰქონდა მთელი სხეული, სახიდან ფეხებამდე, მერე დაჭრილია, ბეჭებზე, ყველგან. ყელი მოჭრილი ჰქონდა. საშინლად მომიკლა შვილი”, – ამბობს გარდაცვლილის დედა.
შეგახსენებთ, რიტა ეგნატაშვილი რამდენიმე დღის წინ თურქეთში, არჰავის რაიონში მოკლა ქმარმა, შაქრო აბესლამიძემ, შემდეგ კი თავი მოიკლა. ასევე მოკლულია ბრალდებულის მეგობარი ხვიჩა ოსანაძე.
თურქულმა მედიამ გაავრცელა ინფორმაცია, რომ მკვლელობა ეჭვიანობის ნიადაგზე მოხდა, რასაც მოკლული ქალის ოჯახი უარყოფს.
“ისე მოკლეს ორივენი, რომ სულ სხვანაირად გამოიტანეს პასუხი, ვითომ მეგობარი იყოო, უღალატაო… ეგრე არ ყოფილა არაფერი”, – ამბობს გარდაცვლილის დედა.