ფეისბუკზე ატვირთული სიმღერის გამო თბილისის საქალაქო სასამართლოს მოსამართლე კობა ჩაგუნავამ მომღერალი სოფო ბათილაშვილი სამართალდამრღვევად ცნო. ცნობილი საპროტესტო სიმღერა „ოლე-ოლა”-ს ინტერპრეტირებული ვერსია მომღერალმა 8 ოქტომბერს განათავსა სოციალურ ქსელში, სამართალდარღვევის ოქმი კი ამ პოსტზე 21 ოქტომბერს შეადგინა შსს-ს სიძულვილთან ბრძოლის დეპარტამენტის თანამშრომელმა თამარ რეზესიძემ
ბათილაშვილის დაცვის მხარე ამბობს, რომ სიმღერის გამო მომღერლის სამართალდამრღვევად განხილვა ეწინააღმდეგება კონსტიტუციას, რომელიც არა მხოლოდ გამოხატვის, არამედ შემოქმედებით თავისუფლებასაც იცავს
შსს-ს წარმომადგენელთა პოზიციით, სიმღერა „ოლე-ოლა”, როგორც უწმაწური სიტყვების შემცველი ნაწარმოები, შეურაცხმყოფელია როგორც ფართო საზოგადოებისთვის, ისე კონკრეტულად „ქართული ოცნების” მხარდამჭერებისთვის; შსს-მ სასამართლოს მოქალაქეთა მიმართვები წარუდგინა, სადაც მათი თქმით, ამ სიმღერის გამო მომხდარ უთანხმოებებზეა შეტყობინებები გაკეთებული
ადვოკატის კითხვაზე, კონკრეტულად რა ქმედებაა მომღერლის მხრიდან სამართალდარღვევად მიჩნეული, სიმღერის ჩაწერა, ვიდეოს გადაღება თუ მისი განთავსება სოციალურ ქსელში, სახელმწიფოს პოზიციაა „ვიდეოს ატვირთვა სოციალურ ქსელში”