„საქართველოს რკინიგზა” 10 ერთეული ახალი, ოთხვაგონიანი სამგზავრო ელექტრომატარებლების შესყიდვაზე საერთაშორისო ტენდერს აცხადებს. შესყიდვის საერთო ღირებულება 70 მლნ აშშ დოლარია. შესაბამისად, გამოდის, რომ ერთი შემადგენლობის სავარაუდო ღირებულება 7 მლნ დოლარი იქნება.
ახალი სამგზავრო მატარებლების შესყიდვა საქართველოს რკინიგზის 10-წლიანი განვითარების გეგმის მნიშვნელოვანი ნაწილია. შესყიდვა აზიის განვითარების ბანკის (ADB) დაფინანსებით განხორციელდება.
როგორც „აზიის განვითარების ბანკის“ მიერ გამოქვეყნებულ დოკუმენტშია ნათქვამი, „საქართველოს რკინიგზამ“ მათ დაფინანსების მისაღებად მიმართა. ცნობილი ხდება, რომ ტენდერში მონაწილეობის მიღება ADB-ის შესაბამისი წყარო ქვეყნებიდან მონაწილეებს შეუძლიათ.
უფრო კონკრეტულად კი, დოკუმენტში ნათქვამია, რომ „საქართველოს რკინიგზის“ მიერ წარგენილი შეთავაზება 10-წლიანი გეგმის მნიშვნელოვანი ნაწილია.
„საქართველოს რკინიგზის“ მიერ გავრცელებული ინფორმაციის თანახმად, თითოეული ოთხვაგონიანი ელექტრომატარებლის შემადგენლობა გათვლილი იქნება მინიმუმ 280 მგზავრზე და მოიცავს ბიზნეს, პირველ და მეორე კლასებს. მატარებლები სრულად იქნება ადაპტირებული შეზღუდული შესაძლებლობის მქონე პირებისთვის.
„ახალი მატარებლები საქართველოს რკინიგზას მეტი რეისების შესრულების და შედეგად, მგზავრების ორჯერ მეტი რაოდენობის მომსახურების შესაძლებლობას მისცემს. თავის მხრივ, მგზავრთნაკადის ზრდა მნიშვნელოვანი ხელმშემწყობი ფაქტორი იქნება ქვეყანაში ტურიზმის, ზოგადად ეკონომიკის განვითარების თვალსაზრისით“ – ნათქვამია განცხადებაში.
ტენდერში მონაწილეობაზე განაცხადის შეტანა 2027 წლის 11 იანვარს, თბილისის დროით 3 საათზე დასრულდება.