საქმის ობიექტურად და სამართლიანად წარმართვისთვის ძალიან მნიშვნელოვანი ეტაპი არის მტკიცებულებების გამოკვლევა – მოსარჩელე მხარე როდესაც ითხოვს 5 ევროპული პარტიის გაუქმებას, საზოგადოებამ და ჩვენც უნდა ვიცოდეთ, რა მტკიცებულებები აქვთ ამისათვის, – ამის შესახებ „ერთიანი ნაციონალური მოძრაობის“ ერთ-ერთმა ლიდერმა, ლევან ბეჟაშვილმა საკონსტიტუციო სასამართლოში ჟურნალისტებთან საუბრისას განაცხადა.
მისი თქმით, სხდომების დაწყებიდან მე-9 დღესაც კი მხარეებისთვის ბუნდოვანია, კონკრეტულად რომელ პარტიას რა ბრალი ედება და რა მტკიცებულებებით მყარდება სარჩელი.
„საქმის ობიექტურად და სამართლიანად წარმართვისთვის ძალიან მნიშვნელოვანი ეტაპი არის მტკიცებულებების გამოკვლევა. მოსარჩელე მხარე როდესაც ითხოვს 5 ევროპული პარტიის გაუქმებას, საზოგადოებამ და ჩვენც უნდა ვიცოდეთ, რა მტკიცებულებები აქვთ ამისათვის.
ის, რომ საგამოძიებო კომისიაში შეყრილი არის ყველა ჭორ-მართალი, ამაზე არაერთხელ ითქვა და საზოგადოებისთვისაც გაშუქდა. ჩვენ უნდა ვიცოდეთ, სასამართლო რა მტკიცებულებას მიიჩნევს დასაშვებად, რას – დაუშვებლად და რას ამორიცხავს. ამიტომ, ჩვენ ვითხოვდით ამ შუამდგომლობის დაყენებას და ველოდებით სასამართლოს საბოლოო გადაწყვეტილებას. მე-9 დღეა სასამართლო სხდომები იმართება პარტიების გაუქმებაზე და მხარეებმა ჯერ თავადაც არ იციან, რომელ პარტიას რა ბრალს უყენებენ და იმავდროულად რა მტკიცებულებებით ამყარებენ, იმიტომ რომ მტკიცებულებებში საერთოდ გარღვევა აქვთ. არის „ქართული ოცნების“ მხარდამჭერების ჩვენებები, არის პირდაპირ ტყუილები, რაზეც საჯაროდაც ვისაუბრეთ და კიდევ მივაწვდით ინფორმაციას საზოგადოებას. ამიტომ ეს პროცესი ძალიან მნიშვნელოვანია და სასამართლომ ობიექტურად უნდა გადაწყვიტოს”, – განაცხადა ბეჟაშვილმა.