უფლისციხის ისტორიულ კომპლექსში, თამარის დარბაზში, შესაძლოა, კლდის ჩამოშლის საფრთხე არსებობდეს. მდგომარეობის ამსახველ ფოტოებსა და ინფორმაციას გიდი ნანა ზარდიაშვილი ავრცელებს. მისი ცნობით, არსებობს ქვათაცვენის საშიშროება, რამაც შესაძლოა საფრთხე შეუქმნას ისტორიული ძეგლის დამთვალიერებლებს.
თამარის დარბაზი უფლისციხის ერთ-ერთი გამორჩეული ნაგებობაა. კლდეში გამოკვეთილი ორსვეტიანი დარბაზი განსაკუთრებით ცნობილია კესონური ჭერით, რომლის დაზიანებაც, გავრცელებული ინფორმაციის თანახმად, შეშფოთების საფუძველს ქმნის.
“ტვ პირველმა” ვითარების გარკვევა ადგილზე სცადა, თუმცა ხელმძღვანელი პირები კულტურული მემკვიდრეობიოს ეროვნულ სააგენტოსთან გვამისამართებენ.
“ზოგადად, კვლევა მიდის უკვე რამდენიმე წელია. ხელმძღვანელი რომ ვარ, ყველას თავისი ფუნქცია აქვს ამ სამსახურში. ზუსტად ვიცი, რომ პროვოკაციაზე ხართ მოსული. შემობრძანდით, გადაიღეთ, თუ რამე საფრთხის შემცველია ძეგლზე, მერე გაგცემთ მაგაზე პასუხს” – ამბობს ტერიტორიის ხელმძღვანელი.