ლევან ჯანგველაძის მკვლელობის ორგანიზებაში ბრალდებული ყოფილი გენერალური პროკურორი ოთარ ფარცხალაძე ბრალდებას უარყოფს. მოსკოვში მიცემულ ინტერვიუში მან დაადასტურა, რომ ჯანგველაძეს პირადად იცნობდა და თქვა, რომ მასთან კარგი ურთიერთობა ჰქონდა.
„ეს საქმე შეკერილია თავიდან ბოლომდე. ლევანი ჯანგველაძის მკვლელობაზე გესაუბრებით. მე მაგ ადამიანს ვიცნობდი, მქონდა ჩემი ურთიერთობა, ვხვდებოდით ხოლმე. კარგი ურთიერთობა მქონდა. დანარჩენი, ბევრს არ ვილაპარაკებ ამ საქმეზე – ყველაფერი სიცრუეზეა აგებული, – განაცხადა ფარცხალაძემ.
ფარცხალაძე მის წინააღმდეგ წაყენებულ ბრალდებებს რუსეთთან კავშირსა და დასავლეთის სანქციებს უკავშირებს. ის ქოლცენტრების საქმესთან რაიმე კავშირსაც უარყოფს.
„პირველი ეს არ მოეწონა დასავლეთს, დამასანქცირეს. აი, მაგის მერე დაიწყო ყველაფერი. შემდეგ მკვლელობაზე [ბრალდება], ამას დაამატეს მეორე, თითქოს ქოლცენტრებში ვიყავი. ეგეც სისულელეა, პირდაპირ გეტყვით. არანაირი შეხება დანაშაულთან არ მქონია“, – განაცხადა მან.