რუმინეთში გამართულ „ევროპული ღირებულებების ტიმიშოარას ფორუმზე“ საქართველოს მეხუთე პრეზიდენტმა ისაუბრა იმაზე, თუ როგორ ხედავს დემოკრატიის გადარჩენის გზას.
მან ბოლო პერიოდში რამდენიმე ქვეყანაში განვითარებული მოვლენები გაიხსენა და აღნიშნა, რომ ქვეყნებში ცვლილებები მოახდინა ერთობამ, მათ შორის ახალგაზრდების გაერთიანებამ ერთი მიზნის გარშემო.
მან ასევე ბელორუსის მაგალითი გაიხსენა და ხაზი გაუსვას იმას, თუ რა ფასი შეიძლება ჰქონდეს დიქტატორულ მმართველობას.
ასე რომ, საქართველო მარტო არ არის, და სწორედ ამიტომ აქვს ამ მაგალითებს მნიშვნელობა, ამ შემთხვევებს აქვს მნიშვნელობა, რადგან თითოეული მათგანი განსხვავებულად აჩვენებს იმას, თუ როგორ უძლებს ან მარცხდება დემოკრატია. სერბეთი აჩვენებს, რომ მშვიდობიანი შეუპოვრობა მუშაობს. სტუდენტების თაოსნობით თითქმის ორწლიანი პროტესტი, რომელიც ანგარიშვალდებულების დაცვას ემყარებოდა, სამაგალითო საარჩევნო შედეგად იქცა, რამაც აჩვენა, რომ მოქალაქეები უმწეონი არ არიან. უნგრეთში აჩვენებენ, რომ არჩევნებს შეუძლია ცვლილებების მოტანა, მიუხედავად იმისა, რომ მმართველი ძალა ყველაფერს აკონტროლებს: კანონებს, ხალხის წინააღმდეგ ყველაფერი იყო აღმართული, მაგრამ შემდეგ ოპოზიციამ შეძლო, პოლიტიკური პარტიული უთანხმოებები გვერდზე გადაედო, ერთიანი ფრონტი შეექმნა და ეს არჩევნები მოეგო. მოლდოვა აჩვენებს, რომ დემოკრატიულ არჩევანს შეუძლია გადაურჩეს საგარეო ჩარევასაც კი — და თან ძალიან მძიმე საგარეო ჩარევას — როდესაც საზოგადოება და პარტნიორები ერთად მოქმედებენ. ბელარუსი აჩვენებს რეპრესიებისა და ავტორიტარული მმართველობის საბოლოო ფასს და იმას, თუ რა ხდება, როდესაც დამოუკიდებელი ინსტიტუტები იშლება. უკრაინა აჩვენებს, თუ რა შეიძლება დაჯდეს სუვერენიტეტის დაცვა, – თქვა ზურაბიშვილმა.
სალომე ზურაბიშვილი რუმინეთში, ტიმიშოარაში გამართულ „ევროპული ღირებულებების ფორუმზე“ (Timișoara Forum for European Values), მთავარი მომხსენებლის სტატუსით წარსდგა.
ფორუმი დიალოგის ევროპული პლატფორმაა, რომელიც დემოკრატიულ მედეგობას, ქალთა ლიდერობას, ახალგაზრდობის ჩართულობას, სამოქალაქო მონაწილეობასა და იმ ღირებულებებს ეძღვნება, რაც თავის მხროვ, ევროპული პროექტის საფუძველს წარმოადგენს.
ფორუმში მონაწილეობენ ევროპელი პოლიტიკური ლიდერები, დიპლომატები, ხელისუფლების წარმომადგენლები და სამოქალაქო საზოგადოების წევრები.