საპარლამენტო უმრავლესობის წევრი, ირაკლი ზარქუა, ევროკავშირის წევრ დიდ სახელმწიფოებში მიმდინარე პროცესებსა და ეკონომიკურ პრობლემებს ეხმაურება და აცხადებს, რომ ეს არასწორი, უსამართლო და ორმაგი სტანდარტის პოლიტიკის შედეგია.
ზარქუას თქმით, საქართველოს ხელისუფლებას მოუწოდებდნენ ფრონტის გახსნას, სანქციების დაწესებასა და ჩარტერული რეისით უკრაინაში მეომრების გაშვებას, თუმცა ხელისუფლებამ ეროვნული ინტერესების დაცვა და პრაგმატული პოლიტიკა აირჩია, რისი წყალობითაც დღეს ქვეყანაში მშვიდობა და ეკონომიკური ზრდაა.
„დღეს რა პროცესებიც მიმდინარეობს ევროკავშირის დიდ სახელმწიფოებში – საფრანგეთი, ესპანეთი, გერმანია, იტალია და ა.შ., დომინოს ეფექტივით მიჰყვება დანარჩენებიც, ეს სწორედ არის ამ ,,მარტა კოსების” ამ ,,კალასების”, ,,რაისა კომუნისტკას” და მათი სადაქალოს პოლიტიკის შედეგი. ჩვენ მოგვიწოდებდნენ – კიდევ კარგი, არ დავუჯერეთ – ფრონტის ხაზები გაგვეხსნა რუსეთთან, სანქციები დაგვეწესებინა, ჩარტერი გაგვეშვა საომრად, თვითონ ჩუმად იყვნენ, თვითონ ვაჭრობდნენ და დღემდე ვაჭრობენ რუსეთთან. კიდევ კარგი, რომ არ დავუჯერეთ, ჩვენ ავირჩიეთ პრაგმატული პოლიტიკა, ეროვნული ინტერესების დაცვა, ხოლო, მათი ამ გაუგებარი პოლიტიკის შედეგია სწორედ, რომ დღეს მილიონზე მეტი მომიტინგე გამოდის საფრანგეთში და ეს არის დაანონსებული; ეს იმის შედეგია, რომ დღეს, გერმანიაში რაც კანცლერები ჰყოლია გერმანიას, მერცს ყველაზე სამარცხვინო რეიტინგი აქვს. სწორედ იმ არასწორი უსამართლო ორმაგი სტანდარტის დამოკიდებულებაა ის, რაც ხდება ცენტრალურ ევროპაში და სამარცხვინო შედეგიც არის. მაღალი ინფლაცია, რეცესია, უმუშევრობა იზრდება, გაფიცვები ყოველდღიურად მატულობს – ეს არის დღევანდელი ევროკავშირის და ევროპის პოლიტიკის შედეგი, რასაც იმკიან. ჩვენ არ დავუჯერეთ, ჩვენ გავყევით ეროვნულ პოლიტიკას, ავირჩიეთ სუვერენიტეტი, ავირჩიეთ ქართველი ხალხის ნება, ამიტომ გავიმარჯვეთ. დღეს გვაქვს მშვიდობა, ეკონომიკური ზრდა და დღეს იმაზე ვფიქრობთ, ცალკეულ რეგიონებში რომელი პროექტი ჯობია რომელს და ასე შემდეგ, და ჩვენ სამეზობლოში მეორე დღე გაუთენდებათ თუ არა, ეს არ იციან, მაგალითად, უკრაინაში და ა.შ. სწორი პოლიტიკა ის არის, რომ ეროვნულ ინტერესს და ეროვნულ სუვერენიტეტს დაიცავ.“- განაცხადა ზარქუამ.