ალეკო ელისაშვილის ადვოკატები პატიმრობაში მყოფი პოლიტიკოსის მიმართ შეზღუდვების მოხსნას ითოვენ – უფლებადამცველებმა შესაბამისი წერილით გენერალურ პროკურორს, გიორგი გვარაკიძეს მიმართეს.
როგორც გენერალურ პროკურატურასთან გამართულ ბრიფინგზე ადვოკატებმა განაცხადეს, ელისაშვილს ერთი წელია არ ეძლევა ოჯახის წევებთან სატელეფონო კავშირის უფლება, რაც პროკურატურამ ახალი დადგენილებით კიდევ გაუხანგრძლივა.
ასევე უფლებადამცველები ითხოვენ პოლიტიკოსის ოჯახის წევრებისთვის იმ ტექნიკის დაბრუნებას, რომელიც ელისაშვილის სახლიდან ერთი წლის წინ ამოიღეს.
მათი თქმით, აღნიშნული ტექნიკა ეკუთვნის ელისაშვილის ცოლს და შვილებს და არანაირი შემხებლობა არ აქვს საქმესთან.
“წარვადგენთ წერილობით მოთხოვნას გენერალურ პროკურორთან – საკითხი შეეხება უკანონო პატიმრის, ოპოზიციონერი პოლიტიკოსის, ალეკო ელისაშვილის მიმართ ახალ გადაწყვეტილებებს პროკურატურის მხრიდან, რომლითაც მას გარესამყაროსთან კავშირი აქვს შეზღუდული. ეს ჩვენ გავასაჩივრეთ სასამართლოში და გენერალურ პროკურატურასაც მივმართავთ, რომ გაერკვეს ამ საკითხში და დაასრულოს ის უკანონობა, რაც მსჯავრდებულის მიმართ ერთი წლის განმავლობაში ხორციელდება. მას ჩამორთმეული აქვს ის უფლებები, რაც ყველა მსჯავრდებულისთვის და პატიმრისთვის გარანტირებულია, რომ სატელეფონო კომუნიკაცია ჰქონდეს ოჯახის წევრებთან და ადვოკატთთან. ასევე ერთი წელი გავიდა მომხდარი ამბიდან, რაც ამოღებული იყო გამოძიების მხრიდან ნივთები – საუბარი მაქვს კერძო საკუთრებიდან ამოღებულ კომპიუტერებსა და ტექნიკაზე, რაც ეკუთვნოდა ელსიაშვილის ოჯახის წევრებს და დღემდე ეს ნივთები დაბრუნებული არ არის, მიუხედავად იმისა, რომ გამოძიებამ დაადგინა, რომ ამ ნივთებს არანაირი კავშირი გამოსაძიებელ საქმესთან და კონკრეტულ მსჯავრდების საქმესტან არ აქვს.
ჩვენ ვთხოვთ გენერალურ პროკურორს, გაერკვეს ამ საკითხში და მიიღოს სამართლიანი გადწყვეტილება, რათა ამ ადამიანის უფლებები იყოს დაცული. ფაქტიურად, ერთი წლის განმავლობაში კერძ მესაკუთრეები ვერ სარგებლობენ თავიანთი საკუთრებით ყოველგვარი სამართლებრივი საფუძვლის გარეშე. ამიტომ მნიშვნელოვანია, გენერალურმა პროკურორმა შეისწავლოს ეს საკითხი და მიიღოს სამართლიანი გადაწყვეტილება”, – განაცხადა ადვოკატმა არჩილ ჩოფიკაშვილმა.