საქართველოს ეროვნულმა ბანკმა სავალუტო ბაზარზე არსებული ვითარება მიმოიხილა. ეროვნული ბანკის ინფორმაციით, სექტემბერში წინა თვესთან შედარებით, ლარის საშუალო გაცვლითი კურსი აშშ დოლარის მიმართ 2.6177- დან 2.6114-მდე, ანუ 0.2%-ით, ხოლო ევროს მიმართ 3.0330-დან 3.0086-მდე, ანუ 0.8%-ით გამყარდა.
მათივე ცნობით, თვის ბოლოს ლარის ოფიციალურმა გაცვლითმა კურსმა აშშ დოლარისა და ევროს მიმართ 2.6051 და 2.9552 შეადგინა. აღნიშნულ პერიოდში ლარი-დოლარის გაცვლითი კურსის მაქსიმალური მნიშვნელობა 2.6250 იყო, მინიმალური კი – 2.6051.
სექტემბერში, საშუალო კურსთან შედარებით, გაცვლითი კურსის მაქსიმალური მნიშვნელობა მინიმალურზე მეტად იყო გადახრილი.
„სექტემბერში, საშუალოდ დოლართან მიმართებაში, თურქულმა ლირამ, როგორც თვის, ასევე წლიურ ჭრილში გაუფასურება განაგრძო. შესამჩვევად გაუფასურდა რუსული რუბლი, ასევე ევრო. როგორც თვის, ასევე წლიურ ჭრილში გამყარდა სომხური დრამი, აზერბაიჯანული მანათი კი პრაქტიკულად არ შეცვლილა. რაც შეეხება ლარს, გამყარება შეინიშნება როგორც თვიურ, ასევე წლიურ დონეზე. შედეგად, ლარის ნომინალური ეფექტური გაცვლითი კურსი გამყარდა როგორც თვიურ, ისე წლიურ ჭრილში. კერძოდ, სექტემბერში წლიურად 6.7%-ით, თვის ჭრილში კი 1.0%-ით გამყარდა.
რაც შეეხება ლარის რეალურ ეფექტურ გაცვლით კურსს, სექტემბერში იგი წლიურად 4.0%-ით, თვის ჭრილში კი 0.6%-ით გამყარდა. ლარის რეალური ეფექტური გაცვლით კურსის გამყარებას დიდწილად ლარის ნომინალური ეფექტური გაცვლითი კურსის გამყარება განაპირობებდა. მეორე მხრივ, წლის ჭრილში ცალკეულ ქვეყნებთან, მათ შორის თურქეთთან, ინფლაციათა მაღალი დიფერენციალი ლარის რეალურ ეფექტურ გაცვლით კურსზე გაუფასურების მიმართულებით აისახებოდა.
ზოგადად, ეფექტური კურსის გამყარება ქვეყნის კონკურენტუნარიანობაზე უარყოფითად აისახება, თუმცა იმპორტულ ინფლაციაზე შემცირების მიმართულებით მოქმედებს. გლობალურად მომატებული გაურკვევლობის და გაზრდილი ინფლაციური რისკების ფონზე ძირითადი სავაჭრო პარტნიორი ქვეყნების ინფლაციები გაიზარდა“, – ნათქვამია ეროვნული ბანკის ანგარიშში.