2026 წლის ივლისი-სექტემბრის პერიოდში, რეადმისიის ფარგლებში, ევროკავშირის ქვეყნებიდან საქართველოში დაბრუნების შესახებ თანხმობა 745 პირზე გაიცა. ჯამში, მიმდინარე წლის 9 თვეში კი რეადმისიას 2 156 მოქალაქე დაექვემდებარა.
შინაგან საქმეთა სამინისტროს სტატისტიკური მონაცემების თანახმად, 2026 წლის მე-3 კვარტალში რეადმისიის სულ 753 განცხადება განიხილეს, საიდანაც უარი მხოლოდ 8 პირზე გაიცა.
როგორც ოფიციალური მონაცემებიდან ჩანს, 2026 წლის ბოლო 3 თვეში ყველაზე მეტი საქართველოს მოქალაქე გერმანიიდან დააბრუნეს, რომელსაც რეადმისიის მაჩვენებლით მოსდევს ირლანდია და საფრანგეთი.
უფრო კონკრეტულად, „ბიზნესპრესნუსი“ შინაგან საქმეთა სამინისტროს სტატისტიკაზე დაეყრდნოთ გთავაზობთ ევროპის იმ ქვეყნების ჩამონათვალს, საიდანაც 3 თვეში (ივლისი-აგვისტო-სექტემბერი) ყველაზე მეტი ქართველი გამოაბრუნეს:
გერმანია – 349 პირი
ირლანდია – 148 პირი
საფრანგეთი – 96 პირი
საბერძნეთი – 36 პირი
დიდი ბრიტანეთი – 32 პირი
პოლონეთი – 19 პირი
ესპანეთი – 19 პირი
შვეიცარია – 16 პირი
იტალია – 10 პირი
ამასთან, შსს-ს სტატისტიკის მიხედვით საქართველოს 5-5 მოქალაქე გამოუშვეს შვედეთიდან და ბელგიიდან, 3 – ბულგარეთიდან, 2 – ავსტრიიდან და ა.შ.
რაც შეეხება გასული წლის მონაცემებს, 2025 წელს ევროპიდან რეადმისიის ფარგლებში უნებართვოდ მცხოვრები საქართველოს 3 437 მოქალაქე დააბრუნეს.
შეგახსენებთ, რომ საქართველოსა და ევროკავშირს შორის „უნებართვოდ მცხოვრებ პირთა რეადმისიის შესახებ“ შეთანხმება 2011 წლის 1-ელ მარტს ამოქმედდა. შეთანხმების საფუძველზე ხდება ევროკავშირის ტერიტორიაზე არალეგალურად მცხოვრები საქართველოს მოქალაქეების საქართველოში დაბრუნება.
შეთანხმება ასევე ითვალისწინებს მესამე ქვეყნების მოქალაქეთა საქართველოში დაბრუნებას შეთანხმებით დადგენილი პირობების საფუძველზე. რეადმისიასა და ტრანზიტთან დაკავშირებულ ყველა სატრანსპორტო ხარჯს, საბოლოო დანიშნულების სახელმწიფოს საზღვრამდე, მოთხოვნის წარმდგენი სახელმწიფო აანაზღაურებს.