თბილისის მერიის მიერ მიუსაფარი ძაღლების ქალაქიდან სრულად გაყვანის შესაძლო გეგმის შესახებ ახალი ინფორმაცია ვრცელდება. გავრცელებული ცნობების თანახმად, საჯარო გახდა სავარაუდო შიდა მიმოწერა, რომელშიც ერთ-ერთი პირი, ვინმე გიორგი კაკაჩია კონკრეტულ მითითებებს გასცემს, რომ დედაქალაქის ქუჩებში წლის ბოლომდე მიუსაფარი ძაღლები აღარ დარჩნენ.
ცნობილია, რომ გიორგი კაკაჩია, რომელიც ნიკა არაგველის მარჯვენა ხელად მოიაზრება, არსებული ინფორმაციით, სააგენტოს ეკიპაჟების უფროსია. სწორედ ის წერს, რომ “წლის ბოლოს ქალაქში კატები უნდა ყეფდნენ” და ბიჭებს მოუწოდებს, რომ “მოუმატონ”. საუბარია ბიჭებზე, რომლებიც აღნიშნულ ჩატში იწერებიან, თუ რამდენი ძაღლი მოათავსეს მათ კონკრეტული დღის ბოლოს თავშესაფარში.
აღნიშნული მიმოწერის ავთენტიკურობა და თარიღი ჯერჯერობით უცნობია. საკითხზე განმარტება არცერთ უწყებას ჯერ არ გაუკეთებია.
ინფორმაცია განსაკუთრებით საყურადღებოა თბილისში ძაღლების სავარაუდო მასობრივი დახოცვის შესახებ ბოლო დღეებში გავრცელებული კადრებისა და საზოგადოების პროტესტის ფონზე.
ცხოველთა მონიტორინგის სააგენტო მასობრივი და მიზანმიმართული დახოცვის ბრალდებებს უარყოფს და აცხადებს, რომ გავრცელებული ვიდეომასალა კანონით ნებადართულ პროცედურას ასახავს. ამასთან, შინაგან საქმეთა სამინისტრომ ცხოველების შესაძლო წამებისა და სასტიკი მოპყრობის ფაქტებზე გამოძიება დაიწყო.