„ქართული ოცნების“ დეპუტატების მიერ საარჩევნო კანონმდებლობაში დაგეგმილი ცვლილებები მედიის მიერ წინასაარჩევნო კამპანიის გაშუქების ზოგად წესებს და წინასაარჩევნო კამპანიის საინფორმაციო უზრუნველყოფასაც ეხება.
„საარჩევნო კოდექსიდან“ ამოდის ნორმა და უქმდება კანონის ჩანაწერი, რომლის მიხედვით, თუ რომელიმე საარჩევნო სუბიექტმა თავისი წილი საეთერო დრო ან გაზეთის ფართობი არ გამოიყენა, მაუწყებელს, რადიოსა და გაზეთს უფლება აქვს ეს დრო ან ფართობი დანარჩენ საარჩევნო სუბიექტებს თანაბრად გაუნაწილონ. როგორც ინიციატორი განმარტავს, აღნიშნული ნორმა არ შეესაბამება კანონის მოთხოვნას, რომლის გათვალისწინებით, მაუწყებელს საარჩევნო სუბიექტისთვის ფასიანი წინასაარჩევნო რეკლამის განთავსებისთვის გადახდილზე მეტი საფასურის საეთერო დროის დათმობა ან უფასო რეკლამის განთავსებისთვის კანონით განსაზღვრულზე მეტი დროის დათმობა ეკრძალება და ეს ქმედება აკრძალულ შემოწირულობად ეთვლება.
ამავე პროექტით, დგინდება, რომ პოლიტიკური/წინასაარჩევნო რეკლამა იმგვარად უნდა დამზადდეს, რომ მისი მიმდინარეობისას თვალნათლივ ჩანდეს საარჩევნო სუბიექტის სახელწოდება, რიგითი ნომერი და სიმბოლიკა. „საარჩევნო კოდექსის“ მოქმედი რედაქციის თანახმად კი, პოლიტიკური-წინასაარჩევნო რეკლამის მიმდინარეობისას საარჩევნო სუბიექტის სახელწოდების აღმნიშვნელი ასოების ერთიანი კონტურებისა და მისი რიგითი ნომრის აღმნიშვნელი ციფრების ერთიანი კონტურების ჯამი კადრის ფართობის არანაკლებ 10%-ს უნდა იკავებდეს, ხოლო რეკლამის დასრულებისას, ბოლო 1 წამის განმავლობაში – კადრის ფართობის არანაკლებ 50%-ს.
გარდა ამისა, „საარჩევნო კოდექსში“ ცვლილებებით დგინდება, რომ უფასო სარეკლამო დროის გამოყოფის ვალდებულება შუალედური არჩევნების დროს მხოლოდ ადგილობრივ მაუწყებელზე გავრცელდება.